صوابی(آئی این پی)خیبر پختونخوا کابینہ میں شامل ضلع صوابی سے تعلق رکھنے والے سابق چیر مین ضلع کونسل و سابق سینیٹر اور ممتاز سیاسی شخصیت حاجی محمد غفران خان نے بحیثیت صوبائی وزیر کسی قسم کی سرکاری مراعات نہ لینے کا اعلان کر دیا ہے۔ اور واضح کر دیا ہے کہ تنخواہ ، الائونسز ، رہائش ، سٹاف سمیت دیگر مراعات نہیں لونگا۔
اس سلسلے میں انہوں نے نگران وزیر اعلی خیبر پختونخوا محمد اعظم خان کو ایک مراسلہ بھی ارسال کیا ہے ۔جس میں انہوں نے کہا ہے کہ وہ سرکاری امور کی انجام دہی کے دوران کسی قسم کی سرکاری مراعات یا تنخواہ نہیں لینگے۔ یاد رہے کہ حاجی محمد غفران خان 1979میں اس وقت کے ضلع کونسل مردان کے چیر مین کی حیثیت سے اپنی خدمات انجام دے چکے تھے۔ جب کہ 1988میں جب تحصیل صوابی کو ضلع کا درجہ دیا گیا تو 1991حاجی محمد غفران خان اس دوران ضلع کونسل صوابی کے چیر مین تھے۔اسی طرح وہ 2006میں سینیٹ آف پاکستان کے رکن منتخب ہو گئے۔ اور 2012تک سینیٹر رہے۔بحیثیت ضلع کونسل چیر مین اور سینیٹر وہ بھی کسی قسم کی سرکاری مراعات نہیں لے رہے تھے۔اور اسی طرح روایت کو اب بھی بحیثیت صوبائی وزیر زندہ رکھا۔وہ خیبر پختونخوا کی معروف کاروباری شخصیت حاجی ہاشم علی خان آف شیخ جانہ ضلع صوابی کے فرزند ہے۔قیام پاکستان سے قبل تمباکو کے علاوہ ٹرانسپورٹ کے کاروبار سے منسلک چلے آرہے ہیں۔
ضلع صوابی میں فلاحی کاموں میں بڑھ چڑھ کر حصہ لینے کے علاوہ سرکاری فنڈ کو علاقے کی ترقی اور متوسط طبقے کے فلاح و بہبود پر خرچ کر چکے ہیں۔اور ہمیشہ صوبے اور ضلع کی ترقی کے علاوہ عوام کے فلاح و بہود کے لئے سیاست سے ہٹ کر اپنا کر دارادا کیا ہے یہی وجہ ہے کہ آج ان کی صوبائی وزیر کے عہدے پر نامزدگی پر ہر سیاسی جماعت کے قائدین اور کارکنوں کے علاوہ ہر مکاتب فکر کے لوگوں نے خیر مقدم کیا ہے اور اس امید کااظہار کیا ہے کہ جس طرح موصوف نے اپنے پسماندہ صوبے کے علاوہ اپنے آبائی ضلع صوابی کی تعمیر و ترقی اور عوام کے فلاح و بہبود کے لئے ماضی کی طرح اب بھی اپنا کر دار ادا کیا تھا اسی طرح اب بھی بحیثیت صوبائی نگران وزیر اپنے صوبے اور خاص کر اپنے آبائی ضلع صوابی کی تعمیر و ترقی ،صوبے اور عوام کی حقوق کے لئے ہر فورم پر آواز بلند کرینگے۔
