اسلام آباد (این این آئی)بوسنیا ہرزیگووینا کے صدر (آج) بدھ کو دو روزہ دورہ پر پاکستان پہنچیں گے ۔دفتر خارجہ کے ترجمان کے مطابق وزیر اعظم عمران خان کی دعوت پر بوسنیا کے صدر 4 اور 5 نومبر کو  پاکستان کا دو روزہ سرکاری دورہ کریں گے ، بوسنیا کے صدر کے ہمراہ ایک اعلی سطحی

وفد بھی ہوگا۔ بوسنیا کے صدر دورے کے دوران صدرپاکستان عارف علوی،وزیر اعظم عمران خان سے ملاقات کریں گے ،بوسنیا کے صدر اسپیکر قومی اسمبلی ، وزیر خارجہ ، وزیر اعظم کے مشیر برائے تجارت کے ساتھ الگ الگ ملاقات کریں گے ،وزیر اعظم عمران خان نے مئی 2019 میں مکہ مکرمہ میں 14 ویں او آئی سی سربراہی اجلاس کے ضمنی خطوط پربوسنیا کے صدر سے ملاقات کی تھی۔ترجمان دفتر خارجہ کے مطابق پاکستان بوسنیا ہرزیگوینا کے ساتھ روایتی طور پر گرم جوش اور دوستانہ تعلقات سے لطف اندوز ہے ضرورت کے وقت دونوں ممالک نے ایک دوسرے کی مدد کی ہے۔ 1994-95 کے دوران پاکستان اقوام متحدہ کے امن مشن میں فوجیوں کا ایک اہم حصہ رہا جبکہ بوسنیا ہرزیگوینا نے 2005 میں پاکستان میں آنے والے زلزلے اور 2010 کے سیلاب کے دوران مدد فراہم کی۔فریقین تجارت ، تعلیم ، ثقافت اور عوام سے عوام کے تبادلے سمیت مختلف شعبوں میں مزید گہرے اور وسیع تعاون کے لئے پرعزم ہیں۔بوسنیا کے صدر کا یہ دورہ دوطرفہ تعلقات کو بڑھانے اور دونوں ممالک کے عوام کے مابین باہمی تعاون کے مابین تعلقات کو مستحکم کرنے میں معاون ہوگا۔