اسلام آباد،لاہور(مانیٹرنگ ڈیسک، این این آئی)صوبائی وزیر فیاض الحسن چوہان نے کہاہے کہ جوکچھ ہوتا ہے اچھے کیلئے ہوتاہے،یہ ہم سب کا اللہ پر ایمان ہے۔صوبائی وزیر کالونیز فیاض الحسن چوہان نے سماجی رابطے کی ویب سائٹ ٹوئٹر پر اپنے ٹوئٹ میں کہاہے کہ اطلاعات کی وزارت کی

واپسی پر سب سے زیادہ خوشی میجر گورو آریا،انڈین را،مکس اچارپارٹی اورخصوصاًن لیگ کو ہوئی،خاطرجمع رکھیں وزیراعظم عمران خان کاسپاہی ہوں آپ کی کرپشن اور لوٹ مار کی منجی ٹھونکتا رہوں گا۔پاکستان زندہ باد، دوسری جانب تحریک انصاف کی رہنما فردوس عاشق اعوان نے وزیر اعلیٰ کی معاون خصوصی برائے اطلاعات مقرر ہونے پر وزیر اعظم اوروزیر اعلیٰ سے اظہار تشکرکرتے ہوئے کہا ہے کہ یہ میرے لیے عزت کی بات ہے کہ میرے لیڈر وزیراعظم عمران خان نے میری قابلیت پر بھروسہ کرتے ہوئے عہدہ دیا۔ٹوئٹر پر اپنے بیان میں انہوں نے کہاکہ میں وزیراعلیٰ پنجاب سردار عثمان بزدار کی بھی مشکور ہوں جنہوں نے مجھے اپنی ٹیم میں شامل کیا۔ میں اپنے فرائض بہترین طریقے سے انجام دوں گی۔میں عاجزی سے اس ذمہ داری کو قبول کرتی ہوں،میں وزارت اطلاعات پنجاب میں تبدیلی کے لیے اپنی پوری کوششیں بروئے کار لائوں گی۔