لاہور (این این آئی) سی سی پی او لاہور محمد عمر شیخ نے مدد اور راہنمائی نہ کرنے پر ایک اور ہیڈ کانسٹیبل کو گرفتار کروا دیا،ہیڈ کانسٹیبل بلال کیخلاف تھانہ کاہنہ میں مقدمہ درج کرلیاگیا ۔ بتا یا گیا ہے کہ سی سی پی او لاہور عمر شیخ نے صبح سویرے پولیس ریسپانس چیک کرنے کیلئے

ہیلپ لائن 15 پر کال کی، سی سی پی او لاہور نے ہیلپ لائن 15 پر عام شہری بن کر فرضی کال کرکے مدد مانگی،چوکی ہلوکی کی پٹرولنگ گاڑی پر موجود ہیڈ کانسٹیبل نے مدد کی بجائے تھانہ کاہنہ رابطہ کرنے کی ہدایت کی۔سی سی پی او لاہور نے ہیڈ کانسٹیبل سے راہنمائی کیلئے رنگ روڈ ہیلپ لائن اور تھانہ کاہنہ کے نمبرز بھی مانگے، پٹرولنگ گاڑی پر موجود ہیڈ کانسٹیبل بلال نے مدد اور راہنمائی کی بجائے دوبارہ 15 پر کال کرکے نمبرز لینے کا مشورہ دیا۔ڈیوٹی پر موجود اہلکار کی طرف سے بے حسی کا مظاہرہ کیا گیا۔ سی سی پی او لاہور عمر شیخ نے مدد اور گائیڈ نہ کرنے پر ہیڈ کانسٹیبل بلال کو حوالات میں بند کروا دیا، مقدمہ بھی درج کرلیاگیا ۔ سی سی پی او لاہور عمر شیخ کا کہنا تھاکہ پولیس کا ہے فرض، مدد آپ کی” کے نعرہ کو یقینی بنائیں، شہریوں کی بروقت دادرسی نہ کرنے والوں کیخلاف سخت ایکشن لیا جارہا ہے۔