اسلام آباد(این این آئی+ مانیٹرنگ) وفاقی وزیر فیصل واوڈا نے کہا ہے کہ انتہائی دل دہلا دینے والاموٹر وے سانحہ،ایک اور حوا کی بیٹی کی عصمت دری۔ اپنے بیان میں وفاقی وزیر فیصل واوڈا نے کہاکہ ننھی مروہ اور اب یہ، میں وزیراعظم سے بھی مل رہا ہوں، مجرموں کے خلاف سخت ترین کارروائی ہوگی- وفاقی وزیر فیصل واوڈا نے کہاکہ تمام پارلیمنٹرینز سے استداہے کہ خدارا ان
درندوں کی سرعام پھانسی کی قانون سازی کے لئے ایک ہو۔فیصل واوڈا نے سماجی رابطے کی ویب سائٹ ٹوئٹر پر کہا کہ وزیراعظم سے ابھی ملاقات ختم ہوئی ہے، وزیراعظم پہلے ہی مروہ کیس اور موٹر وے سانحے کا نوٹس لے چکے ہیں، میری تجویز یہ تھی کہ ان درندوں کی سرعام پھانسی پر اگر انسانی حقوق کے علمبرداروں کو تکلیف ہے تو ہر حال میں فوری طور ان وحشیوں کے لئے آختہ کاری کا قانون پاس کیا جائے۔ اس طرح وفاقی وزیر نے خواتین اور بچوں کے ساتھ ایسا شرمناک سلوک کرنے والے مجرموں کو مردانگی سے محروم کرنے کا بل پارلیمنٹ میں پیش کرنے کا اعلان کر دیا ہے۔ اپنے ایک اور ٹوئٹ میں انہوں نے کہاکہ میری تمام پارلیمنٹیرینز سے استدعا ہے کہ اس معاملے میں سیاست اور اختلافات کو پس پشت ڈال کے آگے بڑھیں، اس قانون سازی کے لئے متفق ہوں، آخر یہ اس ملک کی عزت و وقار کا معاملہ ہے، یہ ہم سب کی مائوں بہنوں اور بیٹیوں کا معاملہ ہے۔ واضح رہے کہ وزیراعظم عمران خان نے کراچی میں ننھی مروہ اور لاہور موٹر وے پر خاتون سے افسوس ناک واقعات کا نوٹس لے لیاہے۔ وزیراعظم عمران خان نے لاہور موٹر وے پر خاتون سے اسکے بچوں کے سامنے ڈاکوئوں کی جانب سے افسوسناک واقعہ پر آئی جی پنجاب انعام غنی کو فوری طور پر ملزمان کو گرفتار کرنے کی ہدایت کی ۔جبکہ وزیر اعظم نے کراچی میں ننھی مروہ سے بھی افسوسناک سلوک پر واقعہ کا نوٹس لیا ہے ۔
اس موقع پر وزیر اعظم نے کہا ہے کہ مہذب معاشروں میں ایسے واقعات شرمناک ہیں ۔مجرموں کو مثالی سزا دی جائے، ایسے واقعے ناقابل قبول ہیں۔انہوں نے کہا کہ قانون نافذ کرنے والے اداروں کو ملزمان کی گرفتاری کا ٹاسک دیدیا ہے ۔وزیر اعظم نے ملزمان کو سخت سزائیں دلوانے کا عزم کا اعادہ کرتے ہوئے کہا کہ انسانی حقوق کے تحفظ کیلئے ہرممکن اقدامات کئے جائیں گے۔
