اسلام آباد( آن لائن) مسلم لیگ ن کے رہنما رانا ثنا اللہ نے اعتراف کیا ہے کہ حزب اختلاف کو عدم اعتماد کی تحریک لانے میں مشکلات کا سامنا ہے،اس وقت حزب اختلاف پر حکومت کے خلاف میدان میں آنے کا شدید دباوَ ہے۔
منگل کے روز نجی ٹی وی سے گفتگو کرتے ہوئے راناثناء اللہ نے کہا ہے کہ وزیر اعظم کے خلاف عدم اعتماد کی تحریک کی کامیابی مشکل ہے، تحریک عدم اعتماد پر حکومت مختلف ہتھکنڈے استعمال کرسکتی ہے،وزیر اعظم عمران خان کے خلاف عدم اعتماد کی تحریک کی رائے شماری خفیہ نہیں ہو گی جبکہ حزب اختلاف کو عدم اعتماد کی تحریک لانے میں مشکلات کا سامنا بھی ہے، ان کا کہنا ہے کہ حکومت کے پاس نیب کا ادارہ موجود ہے اور وہ جس پر چاہے الزامات عائد کر دیتی ہے،کوئی بھی حکومت کے خلاف آواز اٹھاتا ہے اس پر کیسز اوپن ہو جاتے ہیں ،خاموش رہیں تو کوئی کیسز نہیں بنتا،حکومت حزب اختلاف کے اراکین پر منشیات کے الزامات عائد کرتی ہے،انہوں نے کہا کہ ملکی معیشت تباہ ہو گئی ہے جبکہ کورونا چیلنج کے علاوہ تیزی سے بڑھتی مہنگائی کا بھی سامنا ہے۔ اس وقت حزب اختلاف پر حکومت کے خلاف میدان میں آنے کا شدید دباوَ ہے۔ شہباز شریف بھر پور طرح سے قائد د حزب اختلاف کا کردار ادا کر رہے ہیں اور حزب اختلاف پہلے کی طرح متحد ہے۔
