اسلام آباد(مانیٹرنگ ڈیسک)پاکستان نے اٹلی کی امداد کرنے کا اعلان کر دیا ۔ نجی ٹی وی چینل نے پاکستان میں اطالوی سفارتخانے کے ذرائع کے حوالے سے دعویٰ کرتے ہوئے کہا پاکستان کرونا وائرس سے متاثرہ اٹلی کو 5لاکھ کلوروکوئین کی گولیاں فراہم کرے گا ۔ تفصیلات کے مطابق پاکستان اٹلی کو کرونا وائرس کے خلاف موثر ثابت ہونے والی دوا ءکلورو کوئین کی 5لاکھ گولیاں فراہم کرے گا۔اس سے متعلق
اطالوی حکام کا کہنا ہے کہ مشکل کی اس گھڑی میں پاکستان کی جانب سے اٹلی کی مدد بہت بڑا فیصلہ اور کلیدی قدم ہے۔دوسری جانب وزیراعظم عمران خان نے کہا ہے کہ ہمارا مقصد یہ ہے کہ لوگ ایک جگہ پر اکٹھے نہ ہوں، ہم چاہتے ہیں لوگوں کو کھانے پینے کی اشیا میں کمی نہ ہو،سامان کی نقل و حرکت کیلئے گڈز ٹرانسپورٹ کی مکمل اجازت ہوگی۔انہوں نے کہا کہ اٹلی میں ایک دن میں 6 سے 700 افراد مررہے ہیں، پاکستان میں صرف 9افراد کورونا وائرس سے انتقال کرچکے ہیں، آج ہم یہ نہیں کہہ سکتے کہ 2 ہفتے بعد پاکستان میں کیا صورتحال ہوگی۔وزیر اعظم نے بتایاکہ چین نے جب لاک ڈاؤ ن کیا تو لوگوں کو گھر پر کھانا پہنچایا، پاکستان میں لوگوں کو گھروں پر کھانا پہنچانا مشکل ہے، ہمارے پاس ایسا انفرااسٹرکچر نہیں کہ لوگوں کو گھروں پر کھانا پہنچا سکیں۔وزیراعظم نے کہاکہ پاکستان میں لوگ بہت خیرات دیتے ہیں، زلزلے اور سیلاب آنے پر لوگوں نے بڑھ چڑھ کرمدد کی تھی، ماضی میں بہت سے علاقوں میں سامان تھا اور کچھ میں بالکل بھی نہیں پہنچ سکا تھا۔انہوں نے کہا کہ ہمیں کورونا سے زیادہ گھبراکر غلط فیصلے کرنے سے خطرہ ہے، یہاں کسی چیز کی کمی نہیں ہے، عوام کو گھبرانے کی ضرورت نہیں ہے۔وزیراعظم نے کہا کہ ہمیں عام آدمی کا زیادہ خیال رکھنا ہے، روزانہ کما کر کھانے والا طبقہ انتہائی پریشانی میں ہے، اس وقت عوام کو تقسیم کرنے کی جو بھی کوشش کریگا، اس کو نقصان ہوگا، ملک میں بہت بڑا طبقہ مشکل میں ہے۔
