اسلام آباد (این این آئی )ملک کے بیشتر علاقوں میں سردی بڑھنے لگی ، آزاد کشمیر کے پہاڑوں نے برف کی سفید چادر اوڑھ لی، ناران اور بابو سر ٹاپ پر بھی برف روئی کے گالوں کی طرح برسنے لگی،علاقے کو ہرقسم کی ٹریفک کیلئے بند کر دیا گیا۔ آزادکشمیر میں موسم سرما کی پہلی برفباری کے بعد پہاڑوں نے برفانی دو شالے اوڑھ لئے ، لوگوں نے گرم کپڑے نکال لئے ، ناران میں پہاڑ بھی برف سے ڈھک گئے ہیں۔ترجمان این ایچ اے کے مطابق بابو سر ٹاپ پر اب تک آٹھ انچ تک برف پڑ چکی ہے ،مکینوں
کو فوری طور پر علاقہ خالی کرنے کا حکم دیا گیا ہے ، علاقے میں تمام ہوٹل بند کر دیئے گئے ہیں ، آئندہ چوبیس گھنٹوں کے دوران کاغان اور ناران میں شدید برف باری کی پیش گوئی کی گئی ہے۔ ترجمان این ایچ اے کے مطابق بابو سر ٹاپ کی بندش سے نیشنل گیمز کی مشعل کا خیبر پختونخوا میں داخلہ مشکل ہو گیا ، نیشنل گیمز کی گلگت سے آنیوالی مشعل ہفتہ کی صبح بابو سر ٹاپ پر وصول کی جانی تھی، ذرائع کے مطابق اس وقت ناران کے ہوٹلوں میں اولمپک ایسوسی ایشن کے عہدیدار اور سرکاری افسروں سمیت درجنوں افراد مقیم ہیں۔ بلوچستان کے مختلف علاقوں میں بھی پارہ نیچے آنے لگا ،تاہم کراچی میں گرمی رنگ دکھا رہی ہے۔محکمہ موسمیات کا کہنا ہے کہ آج اسلام آباد، پنجاب، بالائی خیبرپختونخوا میں بارش کا امکان ہے ، پہاڑوں پر مزید برفباری بھی ہوسکتی ہے۔