لاہور(این این آئی)مسلم لیگ (ن) پنجاب کے صدر رانا ثنا اللہ نے کہا ہے کہ مسئلہ کشمیر پر عوام کے جذبات کے ساتھ کھیلا جارہا ہے اور اگر یہ مسئلہ تقریر سے حل ہونا ہوتا تو بہت پہلے حل ہوجاتا۔عدالت پیشی کے دوران میڈیا سے بات کرتے ہوئے رانا ثنااللہ نے کہا کہ یہ بہت غلط رویہ ہے کہ مسلم لیگ (ن)کی ساری قیادت یہاں موجود تھی اور جب وہ سب چلے گئے تو مجھے عدالت میں پیش کیا گیا،اس طرح کے عوامل سے ظاہر ہوتا ہے کہ حکومت انتقامی کارروائیاں
کر رہی ہے۔ نالائق اعظم تو آج بھی نواز شریف کے اے سی میں پھنساہوا ہے۔رانا ثنا اللہ نے کہا کہ مسئلہ کشمیر پر عوام کے جذبات کے ساتھ کھیلا جارہا ہے، حکومتی ٹولہ ٹرمپ کے ہاتھوں کشمیر کا سودا کرچکا ہے۔ کشمیر کا مسئلہ اگر تقریر سے حل ہونا ہوتا تو بہت پہلے حل ہوجاتا، ہیومن رائٹس کونسل میں فقط 16 ممبران کے دستخط کروا کر قرارداد پیش کرتے تو کچھ ہوتا لیکن 56 میں سے 16 ممالک کے ذریعے تو قرارداد پیش نہیں کرسکے۔
