اسلام آباد (مانیٹرنگ ڈیسک)شاہ محمود قریشی سپیکر قومی اسمبلی کیوں بننا چاہتے ہیں، معروف صحافی مبشر لقمان نے کپتان کے خلاف سازش کا انکشاف کر دیا۔ تفصیلات کے مطابق نجی ٹی وی پروگرام میں گفتگو کرتے ہوئے معروف صحافی مبشر لقمان کا کہنا تھا کہ کافی عرصے سے میرے علم میں یہ بات آرہی تھی کہ شاہ محمود قریشی وزیراعلیٰ پنجاب بننا چاہتے ہیں اور اس کیلئے

وہ کچھ بھی کرنے کیلئے تیارہیں تاہم قدرت کا کرنا ایسا ہوا کہ وہ صوبائی اسمبلی کی ساری نشستیں ہار کر اس دوڑ سے باہر ہو گئے ہیں اور قومی اسمبلی کی صرف ایک نشست ہی جیت سکے۔ حکومت سازی اور کابینہ کی تشکیل کے دوران پارٹی مشاورت کے دوران شاہ محمود قریشی کو وزیر خارجہ کا عہدہ دینے کی پیش کش کی گئی جسے انہوں نے قبول نہیں کیا۔ مبشر لقمان کا کہنا تھا کہ دنیا بھر میں وزیر خارجہ جب کسی دوسرے ملک کا دورہ کرتا ہے تو اسے سربراہ مملکت جتنا پروٹوکول دیا جاتا ہے لیکن شاہ محمود قریشی نے وزیر خارجہ بننے کے بجائے سپیکر قومی اسمبلی کا عہدہ مانگ لیا ہے جس کا پہلو یہ ہے کہ جب وزیراعظم ملک میں نہیں ہوتا تو سپیکر قومی اسمبلی وزیراعظم کے فرائض سر انجام دیتا ہے ۔ اس موقع پر مبشر لقمان کا کہنا تھا کہ کیا یہ عمران خان کے خلاف ایک بڑی سازش ہو رہی ہے اور اس میں شاہ محمود قریشی ملوث ہیں؟۔مبشر لقمان کا کہنا تھا کہ الیکشن کمیشن کی جانب سے عمران خان کی نا اہلی کا فیصلہ آنے کے بعد شاہ محمود قریشی وزیراعظم بن جائیں گے اور وہ اس حوالے سے پیپلزپارٹی کو قابل قبول ہونگے کیونکہ ان کا پرانا ساتھ رہا ہے۔واضح رہے کہ اس سے قبل معروف صحافی حامد میر بھی اپنے کالم میں انکشاف کر چکے ہیں کہ عمران خان نے ان سے ملاقات میں کہا تھا کہ وہ ایک بندے کو وزیر خارجہ بنانا چاہتے ہیں مگر وہ سپیکر قومی اسمبلی بننے کی ضد کر رہا ہے۔ حامد میر کا کہنا تھا کہ چند دن تک اس بندے کا نام سامنے آجائے گا مگر وہ یہاں اس کا نام تحریر نہیں کر رہے تاہم حامد میر کا کالم چھپنے والے روز ہی یہ خبر سامنے آئی تھی کہ تحریک انصاف نے شاہ محمود قریشی کو سپیکر قومی اسمبلی کیلئے نامزد کر دیا ہے۔