لاہور (این این آئی) تحریک انصاف کی سرکردہ رہنما ڈاکٹر یاسمین راشد کو لیگی امیدواروں سے شکست کی ہیٹرک مکمل ہو گئی جبکہ مسلم لیگ (ن) کے رہنما سردار ایاز صادق نے بھی پی ٹی آئی کے امیدوار وں کو شکست دینے کی ہیٹرک کر لی ۔ تفصیلات کے مطابق لاہور میں قومی اسمبلی کا حلقہ این اے 125نئی حلقہ بندیوں سے قبل این اے 120تھا جہاں 11مئی 2013ء کے عام انتخابات میں تحریک انصاف کی ڈاکٹر یاسمین راشد کو 52321 ووٹوں کے مقابلے میں
مسلم لیگ (ن) کے قائد محمد نواز شریف نے 91666 سے زیادہ ووٹ حاصل کر کے شکست دی تھی ۔ نواز شریف کی نا اہلی کے بعد حلقہ این اے 120میں 11ستمبر 2017ء کو دوبارہ ضمنی انتخاب ہوا جس میں مسلم لیگ (ن) کے قائد نواز شریف کی اہلیہ کلثوم نواز مجموعی طور پر 61745 ووٹ لے کر پہلے جبکہ پی ٹی آئی کی ڈاکٹر یاسمین راشد 47099 ووٹوں کے ساتھ دوسرے نمبر پر تھیں۔25جولائی 2018ء کے عام انتخابات میں بھی تحریک انصاف کی ڈاکٹر یاسمین راشد کو مسلم لیگ (ن) کے امیدوار وحید عالم خان نے شکست سے دوچار کردیا ۔ اس طرح ڈاکٹر یاسمین راشد کو لیگی امیدواروں سے شکست کی ہیٹرک مکمل ہو گئی ۔ لاہور میں قومی اسمبلی کا حلقہ این اے 129نئی حلقہ بندیوں سے قبل این اے 122تھا جہاں 11مئی 2013ء کے الیکشن مین مسلم لیگ (ن) کے سردار ایاز صادق 93ہزار 389ووٹ لے کر جیتے تھے جبکہ ان کے مد مقابل تحریک انصاف کے چیئرمین عمران خان 84ہزار 517ووٹ لے کر دوسرے نمبر پر رہے تھے۔تاہم 22اگست کو سردار ایاز صادق کے خلاف الیکشن ٹریبونل کا فیصلہ آنے کے بعد یہ نشست خالی ہوگئی جس پر 11اکتوبر کو دوبارہ ضمنی انتخاب ہوا اور ضمنی انتخاب میں بھی سردار ایاز صادق 75 ہزار سے
زائد ووٹ حاصل کر کے کامیاب رہے جبکہ ان کے حریف اور پاکستان تحریکِ انصاف کے امیدوار علیم خان کو 72 ہزار سے زائد ووٹ ملے ۔25جولائی 2018ء کو ہونے والے انتخابات میں بھی تحریک انصاف کے عبدالعلیم خان کے 94ہزار 879ووٹوں کے مقابلے میں مسلم لیگ (ن) کے سردار یاز صادق ایک لاکھ 3ہزار 21ووٹ حاصل کر کے کامیاب ہوئے ۔ اس طرح سردار ایاز صادق نے بھی تحریک انصاف کے امیدواروں کو شکست دینے کی ہیٹرک مکمل کی ۔
