اسلام آباد(این این آئی) پاکستان نے واضح کیا ہے کہ بھارت جس زبان میں بات کریگا اسی زبان میں جواب دیا جائیگا۔ترجمان دفتر خارجہ ڈاکٹر محمد فیصل نے ایک انٹرویوکے دور ان بھارتی فوج کے سربراہ کے دھمکی آمیز بیانات کا جواب دیتے ہوئے کہا کہ بھارت فوجی طاقت کے ذریعے کشمیریوں کی آواز کو خاموش کر انے میں کامیاب نہیں ہوگا ۔انہوںنے کہاکہ بھارت کشمیری عوام کی جدو جہد آزادی کو دبانے میں کبھی کامیاب نہیں ہوگا
انہوںنے کہاکہ مسئلہ کشمیر کا واحد حل مقبوضہ علاقے میں اقوام متحدہ کے زیر اہتمام استصواب رائے کر انا ہے جس کا وعدہ اقوام متحدہ کی قرارداد میں کیا گیا ہے ۔ ڈاکٹر محمد فیصل نے کہا کہ پاکستان تمام مسائل کا پر امن طریقے سے حل چاہتا ہے لیکن بھارت کو اسے ہماری کمزوری نہیں سمجھنا چاہیے ۔ ترجمان نے کہا کہ بھارت کے حالیہ بیانات سے اس کی بوکھلاہٹ ظاہر ہوتی ہے کیونکہ اس کی ظالمانہ پالیسیوں کا کوئی نتیجہ نہیں نکل رہا ہے ۔
