اسلام آباد (مانیٹرنگ ڈیسک) وزیراعلیٰ پنجاب میاں شہباز شریف نے کہا کہ چوہدری نثار علی خان نے کئی بار میاں محمد نوازشریف سے میری بے عزتی کروائی، تفصیلات کے مطابق ایک نجی ٹی وی چینل کے پروگرام میں بات چیت کرتے ہوئے وزیراعلیٰ پنجاب شہباز شریف نے کہا کہ 1985سے لے کر 1990تک چوہدری نثار نواز شریف کے قریبی دوست تھے اور اس وقت یہ میرے حریف تھے۔

شہباز شریف نے کہا کہ جب میں قومی اسمبلی کا رکن بنا تو اس دوران ایک دو مرتبہ چوہدری نثار نے نواز شریف کو شکایت لگا کرمیری بے عزتی کروائی۔ میاں شہباز شریف نے کہا کہ میرا نواز شریف سے احترام کا رشتہ ہے جس پر میں اللہ کا شکر ادا کرتا ہوں۔ انہوں نے کہا کہ پاکستان کو ایٹمی طاقت بنانے کا سہرا نواز شریف کے سر ہے، یہ کریڈٹ نواز شریف سے کوئی نہیں چھین سکتا لیکن ہم لوگ اس بات سے بھی انکاری نہیں ہیں کہ بھٹو دور سے لے کر اس پروگرام میں کسی حکومت نے اس پر کبھی کوئی سمجھوتہ نہیں کیا۔ انہوں نے کہا کہ میں نے اپنے سیاسی دور میں عوام کی خدمت کی ہے اور کر رہا ہوں جس پر میں اللہ کا شکر ادا کرتا ہوں، شہباز شریف نے عمران خان کے حوالے سے کہا کہ وہ اپنی آنے والی نسلوں کو جھوٹ بولنا سکھا رہے ہیں، عمران خان صرف الزامات لگاتے ہیں، عمران خان خیبرپختونخوا میں کوئی ترقیاتی کام نہیں کرا سکے، انہوں نے کہا کہ میٹرو بس کا منصوبہ صرف اعلان کی حد تک کیاگیا اس پر بالکل کام نہیں کیا گیا، جب صوبے میں ڈینگی کا حملہ ہوا تو موصوف پہاڑوں پر چلے گئے۔ شہباز شریف نے کہا کہ وہ دن دور نہیں جب ملک سے اندھیرے ختم ہوجائیں گے۔ انہوں نے گفتگو کے دوران کہا کہ چوہدری نثار اور نواز شریف کے درمیان اختلافات میں اتنی شدت نہیں ہے۔