سرینگر (این این آئی)مقبوضہ کشمیرمیں بھارتی فوجیوںاور پولیس اہلکاروں نے گزشتہ شب برطانیہ میں چیمپینز ٹرافی کے ایک میچ میں سری لنکا کے خلاف پاکستان کی فتح کا جشن منانے پر ضلع شوپیان میں درجنوں دکانوں اور گاڑیوں کو نقصان پہنچایا ۔ کشمیرمیڈیاسروس کے مطابق مقامی افراد نے صحافیوں کو بتایا کہ جیسے ہی پاکستان نے سری لنکا کے خلا ف میچ جیتا کشمیریوں نے ضلع کے علاقے وائل میںگھروں سے نکل کر جیت کی خوشی میں پٹاخے چلائے اور خوشی منائی۔
تاہم بھارتی فورسز کے اہلکاروںنے اشتعال میں آتے ہوئے گائوں پہنچ کر نوجوانوں کو منتشر کرنے کیلئے فائرنگ اور دکانوں میں لوٹ مار کی ، گھروں اور گاڑیوں کو نقصان پہنچایااور لوگوں کو تشدد کا نشانہ بنایا ۔فورسز کی کارروائی میںمتعدد افراد زخمی ہوگئے ۔ متعدد دکانداروںنے صحافیوںکو بتایا ہے کہ فورسز کے اہلکاروںنے گزشتہ شب کارروائی کے دوران لوٹ مار کی ہے ۔فوجیوںنے ضلع کے علاقے ترکا ون گام میں درجنوں گھروں میں گھس کر اہلخانہ کو تشدد کا نشانہ بنایا اور توڑ پھوڑ کی ۔انہوںنے کہاکہ اہلکار مسلسل 2گھنٹے تک گھروں میںگھس کر لوٹ مار اور لوگوں کو تشدد کا نشانہ بناتے رہے ۔ بھارتی فورسزکی کارروائی میں متعدد افراد زخمی بھی ہوئے جن میں سے شدید زخمی ہونیوالوں کو سرینگر کے ہسپتال منتقل کردیاگیا ہے ۔فورسز کی کارروائی کے خلاف آج زبردست بھارت مخالف مظاہرے کئے گئے ۔
