لاہور(آئی این پی ) سابق فاقی وزیر نذر محمد گوندل نے کہا ہے کہ 6جون کو خاندان سمیت پی ٹی آئی میں شمولیت اختیار کر رہا ہوں،پنجاب میں شہنشاہوں کا راج ہے، عمران خان کے سوا انہیں کوئی چیلنج نہیں کر سکتا، پیسے کی پرچی لیکر پیپلز پارٹی جوائن کی، پارٹی چھوڑنا میرا نہیں خاندان، کارکنوں اور حلقے کے عوام کا فیصلہ ہے۔ اتوار کو پیپلز پارٹی چھوڑنے کے فیصلے پر گفتگو کرتے ہوئے سابق وفاقی وزیر نذر گوندل نے کہا
کہ خود ابھی بھی پارٹی نہیں چھوڑنا چاہتا تھا مگر خاندان، کارکنوں اور حلقے کے عوام کا فیصلہ ہے کہ پی پی چھوڑ دی جائے، چھوٹے موٹے اختلافات تو ہر جگہ ہوتے ہیں مگر پیپلز پارٹی نے بہت عزت دی۔نذر محمد گوندل نے کہا کہ پچیس پیسے کی پرچی لیکر پارٹی جوائن کی، بچے تھے جب پیپلز پارٹی سے ناطہ جوڑا، اب پنجاب کی سیاسی حقیقیت یہ ہے کہ پنجاب میں شہنشاہوں کا راج ہے، عمران خان کے سوا انہیں کوئی چیلنج نہیں کر سکتا، پنجاب کی سیاست کے بادشاہوں کے مقابلے کے لئے تحریک انصاف میں شامل ہونے کا فیصلہ کیا۔انہوں نے مزید کہا کہ عمران خان نے پنجاب کے بادشاہوں کو کھل کر چیلنج کیا اور جس طرح عمران خان نے شریف برادران کو للکارا یہ کوئی اور نہیں کر سکتا تھا، چھ جون کو بنی گالہ میں خاندان کے افراد کے ہمراہ پی ٹی آئی میں شمولیت اختیار کر رہا ہوں۔سابق ایم این اے ذوالفقار گوندل بھی ان کے ساتھ تحریک انصاف میں شامل ہو رہے ہیں۔واضح رہے کہ گزشتہ 20 دن میں پی ٹی آئی کی جانب سے پیپلز پارٹی کی وکٹیں گرانے کا سلسلہ جاری ہے ، نور عالم ، فردوس عاشق اعوان کے بعد نذر محمد گوندل بھی کپتان کا ساتھ دینے کو تیار ہو گئے ، ترجمان پی ٹی آئی فواد چوہدری کے مطابق نذر محمد گوندل 6 جون کو نتھیا گلی میں عمران خان سے ملاقات کے دوران پی ٹی آئی میں شمولیت کا اعلان کریں گے۔
