اسلام آباد (این این آئی)مسلم لیگ (ن) کے پارٹی صدر کے انتخاب کیلئے وزیراعظم نوازشریف کے کاغذات نامزدگی جمع کرا دیئے گئے پیر کو وفاقی وزیر اطلاعات و نشریات سینیٹر پرویزرشید نے وفاقی وزراء خواجہ سعد رفیق، انجینئر خرم دستگیر خان، وزیر مملکت ڈاکٹر طارق فضل چوہدری، انوشہ رحمن، رکن قومی اسمبلی ملک ابرار احمد، ڈاکٹر آصف کرمانی، صدیق الفاروق، سینیٹر نہال ہاشمی، اسلام آباد کے میئر شیخ انصر عزیز، رفعت چوہدری، ذیشان چوہدری سمیت دیگر پارٹی عہدیدار وں کے ہمراہ کاغذات جمع کرائے ۔محمدنوازشریف کے مقابلے میں حیرت انگیزطورپربلوچستان سے ایک امیدوار سردارپرنس بلوچ نے پارٹی صدارت کیلیے کاغذات نامزدگی جمع کروائے ہیں،پارٹی وفد نے وزیراعظم محمد نوازشریف کے بطور پارٹی صدر انتخاب کیلئے کاغذات نامزدگی پارٹی الیکشن کمشنر چوہدری جعفر اقبال کے پاس جمع کروائے۔ کاغذات نامزدگی جمع کروانے کے بعد وفاقی وزیر ریلوے خواجہ سعد رفیق نے میڈیا سے گفتگو کرتے ہوئے کہا کہ 18 اکتوبر کو ہونے والے الیکشن میں پارٹی صدر، چیئرمین، 6 سینئر نائب صدور، سیکرٹری اطلاعات اور سیکرٹری مالیات کے 10 عہدوں پر انتخاب کیا جائے گا۔ انہوں نے کہا کہ پارٹی آئین کے تحت مسلم لیگ (ن) کا صدر منتخب ہونے کے بعد پارٹی کے دیگر عہدوں پر نامزدگی کرنے کا اختیار رکھتا ہے۔ ایک سوال کے جواب میں انہوں نے کہا کہ پارٹی انتخابات کا عمل راتوں رات نہیں ہو سکتا کیونکہ کونسل کی تشکیل چاروں صوبوں، آزاد کشمیر، گلگت بلتستان پر مشتمل 7 زونز سے کی جاتی ہے اور اس عمل میں کئی ماہ لگے ہیں۔ قبل ازیں وزیراعظم محمد نوازشریف نے پارٹی انتخابات کے بارے میں پاکستان مسلم لیگ (ن) کی مرکزی قیادت سے مشاورت کیلئے ایک سیاسی اجلاس کی صدارت کی۔ وزیراعظم میڈیا سیل کی جانب سے جاری بیان کے مطابق مسلم لیگ (ن) کی سینئر قیادت نے وزیراعظم کو (آج) منگل کو ہونے والے پارٹی کنونشن کے انتظامات اور تفصیلات کے بارے میں آگاہ کیا۔ اجلاس میں وزیراعلیٰ پنجاب، وزیر خزانہ، وزیر داخلہ، وزیر منصوبہ بندی و ترقی، وزیر دفاع، وزیر اطلاعات و نشریات، وزیراعظم کے معاونین خصوصی عرفان صدیقی، آصف کرمانی اور وزیر مملکت انوشہ رحمن نے شرکت کی۔