لاہور ( این این آئی) تحریک انصاف کے رائیونڈ میں جلسہ عام کے دوران وی آئی پی پاسز کے غلط استعمال کا انکشاف ہوا ہے ، بعض خواتین خلاف میرٹ وی آئی پی پاسز کا استعمال کر کے اسٹیج پر پہنچ گئیں ، ویڈیو منظر عام پر آنے کے بعد پارٹی خواتین نے شدید احتجاج کرتے ہوئے تحقیقات کا مطالبہ کر دیا ۔ ذرائع کے مطابق تحریک انصاف کے رائیونڈ میں جلسہ کے لئے اسٹیج پر استحقاق کے مطابق بیٹھنے والوں کی لسٹ بنا کر انکو وی آئی پی پاس جاری کئے گئے تھے تاہم جلسہ میں وی آئی پاسز کا غلط استعمال بھی کیا گیا ۔ منظر عام پر آنے والی ویڈیو میں دیکھا جا سکتا ہے کہ اسٹیج پر موجود ایک شخص اپنا وی آئی پی پاس نیچے پھینکنے کے لئے پہلے ادھر اُ دھر دیکھتا ہے اور ایک دفعہ اپنا وی آئی پی پاس جیب میں ڈال لیتا ہے۔موقع ملتے ہی یہ شخص وی آئی پی پاس نیچے پھینکتا ہے اورنیچے کھڑی خاتون اٹھا کر اسی پاس کے ذریعے اسٹیج پر پہنچ جاتی ہے۔اسی خاتون کو بعد میں ایک تصویر میں کپتان کے اسٹیج پر دیکھا جا سکتا ہے۔جہانگیر ترین ، عارف علوی کی فیملیز سمیت پارٹی کی سینئر خواتین نے عام خواتین پنڈال میں بیٹھ کر جلسہ دیکھا۔پارٹی خواتین نے وی آئی پی پاسز کے غلط استعمال پراحتجاج کرتے ہوئے تحقیقات کا مطالبہ کیاہے ۔