اسلام آباد(مانیٹرنگ ڈیسک) پاک فوج کے سربراہ جنرل راحیل شریف نے کہا ہے کہ ہر قسم کی جارحیت کے لئے پوری طرح تیار ہیں ۔
دشمن کو کسی بھی کارروائی کے بعد پچھتانے کا موقع بھی نہیں ملے گا۔ جنرل راحیل شریف انسدادی دہشت گردی کے سنٹر کھاریاں کے دورہ پر موجود تھے اس دوران انہوں نے جوانوں اور افسروں سے گفتگو بھی کی اور دشمن پر واضح کیا کہ کسی بھی قسم کی چھیڑ چھاڑ کا برا خمیازہ بھگتنا پڑے گا۔ کسی نے بھی ہمارے ملک کی طرف آنکھ اٹھا کر دیکھی تو اس کو بھرپور جواب دیں گے۔ آرمی چیف نے کہا کہ مادر وطن کے چپے چپے کا دفاع کیا جائے گا۔ ملک ایک دہائی سے زائد عرصے سے دہشت گردی کا شکار ہے ۔قوم نے اس جنگ میں بے پناہ قربانیاں دی ہیں ۔پیشہ ورانہ صلاحیتوں سے اس جنگ میں دہشتگردوں کو شکست دینے میں کامیاب ہو ئے ہیں۔
