اسلام آباد(مانیٹرنگ ڈیسک) وفاقی وزیر برائے منصوبہ بندی احسن اقبال نے کہا ہے کہ جلد ہی پاکستانی صارفین کے لئے فائیو جی کی سہولت متعارف کروا دیں گے۔
تفصیلات کے مطابق وفاقی وزیر احسن اقبال نے یہ بات صحافیوں سے گفتگو کرتے ہوئے کہی۔ احسن اقبال کا مزید کہنا تھاکہ روابط کو مربوط بنانے کے لئے ملک میں ٹیکنالوجی کی بہتری کی جانب ہر ممکن قدم اٹھایا جائے گا اور جلد ہی پاکستانی صارفین کو فائیو جی کی سہولت بھی میسر کر دی جائے گی جس کے بعد پاکستان فائیو جی استعمال کرنے والے ممالک کی صف میں شامل ہو جائے گا۔
واضح رہے کہ فائیو جی ٹیکنالوجی اس وقت تجرباتی مراحل میں ہے مگر احسن اقبال کا یہ بیان مختلف حلقوں میں مختلف انداز سے لیا جا رہا ہے ۔ سوشل میڈیا پر ایکٹیو صارفین نے اس معاملے پر ملا جلا رد عمل دیا ہے ۔ ایک صارف کے مطابق ن لیگ نے اگلی بار بھی حکومت میں آنے کے خواب دیکھ لئے ہیں۔ جبکہ حکومت کے لئے یہ ناممکن امر ہے کہ 2018 ء سے پہلے فائیو جی ٹیکنالوجی پاکستان میں لانچ کر دی جائے ۔
واضح رہے کہ الیکشن کا سال قریب آتے ہی اور اپوزیشن جماعتوں کی جانب سے مختلف تحریکوں کے بعد حکومت کی جانب سے مختلف منصوبہ جات اور پیکجز کا اعلان کیا جا رہا ہے ۔

موضوعات:فائیو جی