اسلام آباد(مانیٹرنگ ڈیسک)پاکستان تحریک انصاف نے رائیونڈ مارچ پر دیگر جماعتوں کے تحفظات کے بعد مارچ کی تاریخ اور مقام میں تبدیلی پر غور شروع کردیا۔ ذرائع کے مطابق پاکستان تحریک انصاف نے رائیونڈ مارچ کیلئے اپوزیشن قیادت سے روابط کا سلسلہ شروع کر نے کا فیصلہ کیا ہے۔ اس کے علاوہ رائیونڈ مارچ کا مقام تبدیل کرکے جاتی امراء سے چار کلو میٹر دوراڈہ پلاٹ پر احتجاج کرنے پر غور شروع کردیا گیا ہے۔ذرائع کا کہنا ہے کہ پی ٹی آئی کی قیادت نے رائیونڈ مارچ کیلئے اپوزیشن قیادت سے رابطوں کی ذمہ داری بھی سونپ دی ہے جبکہ یہ فیصلہ بھی کیا گیا ہے کہ رائیونڈ مارچ کی تاریخ میں زیادہ تاخیر نہ کی جائے اور مارچ کو چند روز ہی آگے کیا جائے۔
ذرائع نے بتایا ہے کہ تحریک انصاف نے دیگر اپوزیشن رہنماؤں کی جانب سے جاتی امراء پر احتجاج کے حوالے سے تحفظات کھل کر سامنے آنے کے بعد اب جاتی آمرا سے چار کلو میٹر دو ر اڈا پلاٹ پر احتجاج کرنے کے حوالے سے مشاورت شروع کر دی ہے تاہم بعض پارٹی رہنماؤں نے عمران خان کو مشورہ دیا ہے کہ محرم کے پیش نظر اکتوبر سے پہلے ہر صورت مارچ کیا جائے مگر وزیر اعظم کے گھر کے سامنے احتجاج کرنے پر بعض پی ٹی آئی رہنما بھی تیار نہیں ہیں اور انہوں نے عمران خان کو اپنے تحفظات سے آگاہ کر دیا ہے جس کے بعد اب عمران خان نے رائیونڈ مارچ کے مقام اور تاریخ میں تبدیلی کا فیصلہ کیا ہے۔ذرائع نے اس حوالے سے یہ بھی کہا ہے کہ رائیونڈ مارچ کے حوالے سے عمران خان اور طاہر القادری کے مابین ملاقات بھی متوقع ہے جس کیلئے شیخ رشید کوشش کر رہے ہیں۔