اسلام آباد(این این آئی)حکومت کے بڑے بڑے دعوے ہوا میں اُڑ گئے،اقوام متحدہ کی رپورٹ میں ناقابل یقین انکشافات،اقوم متحدہ کی جانب سے جاری رپورٹ میں کہا گیا ہے کہ پاکستان کی آدھی سے زیادہ آبادی غربت کا شکار ہے۔اقوام متحدہ کے ذیلی ادارہ برائے ترقی ومنصوبہ بندی کی جانب سے پاکستان میں غربت کے حوالے سے سالانہ رپورٹ جاری کی گئی ٗ رپورٹ کو 15۔2014 کے اعداد و شمار کی بنیاد پر تشکیل دیا گیا ٗ رپورٹ کی تیاری کے دوران پاکستان میں غربت کی شرح کے تعین کے لیے 15 مختلف اشاریوں کا جائزہ لیا گیا۔رپورٹ کے مطابق پاکستان کی آدھی سے زیادہ آبادی غربت کا شکار ہے، ملک کا غریب ترین صوبہ بلوچستان ہے جہاں غربت کی شرح 55.3 فی صد ہے جب کہ سندھ میں غربت کی شرح 53.5 فیصد، خیبر پختون خوا میں 50.7 فیصد اور پنجاب میں یہ شرح 48.4 فیصد ہے۔