راولپنڈی(این این آئی) ضلعی انتظامیہ نے رواں برس معمول سے زائد مون سون بارشوں کے امکان کے پیش نظر شہرمیں سیلاب بچاؤ وارننگ جاری کردی ہے۔محکمہ موسمیات نے رواں برس مون سون کے دوران معمول سے 25 فیصد زائد بارشوں کی پیش گوئی ہے جس کے پیش نظرراولپنڈی کی ضلعی انتظامیہ نے نالہ لئی سمیت شہر کے 10 بڑے برساتی نالوں میں متوقع سیلاب سے نمٹنے اوربچاؤ کیلئے نئی ‘‘سیلاب بچاؤ’’ وارننگ جاری کردی ہے، جس کے تحت نالہ لئی کے کناروں پرقائم تجاوزات کے خاتمے اور بھل صفائی 30 جون تک مکمل کرلی جائے گی۔ بارش کے دوران تمام متعلقہ ادارے ریڈ الرٹ ہوکرلئی کی متاثرہ آبادیوں میں پہنچ جائیں گے،فوج کے ٹرپل ون بریگیڈ کا ریسکیو دستہ بھی مون سون میں ریڈ الرٹ رہے گا ٗ سیلابی صورت حال کا جائزہ لینے کے لیے منعقدہ اجلاسوں میں فوج کے نمائندے بھی شریک ہوں گے۔سیلاب الرٹ میں کہا گیا کہ جاوید کالونی، ندیم کالونی اورآریہ محلے سے ملحقہ تمام علاقوں کے علاوہ فضل آباد، اسلامیہ ہائی اسکول اورمری روڈ کے عقبی علاقوں کے مکینوں کواپنا تمام قیمتی اشیاء موسم برسات سے قبل محفوظ مقامات پرمنتقل کردیں۔ نالہ لئی میں سیلابی پانی کی سطح 10 فٹ تک آنے پرخطرے کا سائرن بجایا جائے گا، جس پر لوگ اپنے گھروں کو فوری طورپرخالی کرکے محفوظ مقامات پرمنتقل ہوجائیں۔ اس کے علاوہ 31 اگست تک نالہ لئی سمیت دیگر10 بڑے نالوں میں کوڑا کرکٹ اورتعمیراتی ملبہ پھینکنے پربھی پابندی رہے گی۔ادھر محکمہ موسمیات کے مطابق آئندہ 24 گھنٹوں کے دوران بیشتر علاقوں میں موسم گرم اور خشک رہے گا تاہم وفاقی دارالحکومت اسلام آباد، راولپنڈی ، لاہور ،سرگودھا ، گوجرانوالہ ، فیصل آباد ، ساہیوال ، بہاولپور ، ملتان ، پشاور ، ہزارہ ڈویژن اور فاٹا میں آندھی کے ساتھ بارش کا امکان ہے۔ آئندہ 2 روز میں کشمیر اسلام آباد اور بالائی پنجاب میں بارش کا امکان ظاہر کیا گیا ہے۔ محکمہ موسمیات نے پیش گوئی کی کہ صوبہ بلوچستان میں بھی تیز ہواؤں کے ساتھ بارشوں کی امید ہے اور تیز ہواؤں کی وجہ سے گرمی کی حالیہ شدت میں کمی ہوجائے گی۔محکمہ موسمیات کے مطابق ملک میں اب تک سب سے زیادہ درجہ حرارت شہید بے نظیر آباد میں ریکارڈ کیا گیا ہے جہاں پارہ 45 ڈگری کو چھو چکا ہے جبکہ دیگر شہروں میں موہنجودڑو 44 اور بھکر میں 43 ڈگری سینٹی گریڈ ریکارڈ کیا گیا ہے۔محکمہ موسمیات کے مطابق نور پور تھل ، پنجگور ، سکھر ، تربت اور جوہر آباد میں ریکارڈ کیا گیا پارہ 41 ڈگری سینٹی گریڈ ہے۔ لاہور ، پشاور، گوجرانوالہ ، گجرات ، رحیم یار خان ، جہلم ، منگلا ، اوکاڑہ ، سیالکوٹ ، ٹوبہ ٹیک سنگھ اور بہاولنگر میں 40 ڈگری جبکہ فیصل آباد ،حیدر آباد ، جھنگ ، قصور ، ساہیوال ، خان پور ، کوٹ ادو ، ڈیرہ غازی خان 39 اور راولپنڈی ، ملتان ، لیہ اور بہاولپور میں پارہ ابھی تک 38 ڈگری ہے۔ کوئٹہ میں پارہ 37 تک پہنچ چکا ہے جبکہ کراچی ، سیدو شریف اور گوادر میں 35 ڈگری سینٹی گریڈ ہے۔