اسلام آباد(نیوز ڈیسک ) وزیراعظم نے کہا ہے بعض سیاسی مخالفین ترقی میں رکاوٹ ڈال رہے ہیں، تمام ادارے معیشت میں مضبوطی کا اعتراف کر رہے ہیں، یہ منصوبے مکمل ہوگئے تو سال 2018کے الیکشن میں ان کے ہاتھ کچھ نہیں آئے گا اور ان کے منہ بند ہو جائیں گے۔وزیراعظم ہاؤس میں ہونے والے وفاقی کابینہ کے اجلاس سے خطاب میں وزیراعظم میاں محمد نواز شریف کا کہنا تھا کہ سال 1999سے2013تک حکومتیں توانائی کے شعبہ میں سرمایہ کاری کرنے میں ناکام رہیں، جب کہ ہم نے اس شعبہ میں34ارب ڈالرز کی سرمایہ کاری کی۔وزیراعظم نے اس موقع پر واضح کرتے ہوئے کہا کہ یہ سرمایہ کاری ہے قرض نہیں،ہم انشااللہ اپنے دور حکومت میں ملک بھر سے گیس کی قلت کو ختم کردیں گے۔
کابینہ اجلاس سے خطاب میں وزیراعظم نے سیاسی مخالفین کی بے جا تنقید کا بھی جواب دیا، وزیراعظم کا کہنا تھا کہ مخالفین جانتے ہیں کہ ہمارے ترقیاتی کام مکمل ہوگئے تو 2018کے انتخابات اور ترقی کی راہ میں روڑے اٹکانے والوں کے ہاتھ کچھ نہیں آئے گا،2018تک مخالفین کی مخالفت ختم ہو جائے گی۔وزیراعظم کا کہنا تھا کہ تمام ادارے پاکستانی معیشت کی بہتری کا اعتراف کر رہے ہیں، ہم نے اپنے منصوبوں میں شفافیت کے نئے معیار متعارف کرائے، جب کہ مخالفین معاشی ٹیک آف کو روکنے کیلئے کوشاں ہیں۔ انہوں نے کہا ذاتی طور پر خوش ہوں کہ ہم نے تھرکول سے بجلی حاصل کی ہے۔واضح رہے قبل ازیں اجلاس میں ملکی صورت حال کے علاوہ ترقیاتی منصوبوں میں ہونے والی پیشرفت کا بھی جائزہ لیا گیا۔دوران اجلاس وفاقی وزیرخزانہ اسحاق ڈار نے آئندہ بجٹ پر بریفنگ بھی دی۔