کراچی(آن لائن)کراچی میں امن و امان کے حوالے سے اجلاس میں ڈی جی رینجرز میجرجنرل بلال اکبرنے بتایا کہ تفتیش درست نہ ہونے پر4 میں سے ایک ملزم کی ضمانت ہوجاتی ہے،اجلاس میں آئی جی سندھ نے بتایا کہ اب تک 1500ملزمان عدم ثبوت کی بناءپر رہا ہوگئے ہیں جبکہ 8مقدمات فوجی عدالتوں میں بھیجے جارہے ہیں ۔ اس پر وزیراعظم نے وزیر اعلیٰ سندھ قائم علی شاہ کو پراسیکیوشن بہتر کرنے کی ہدایت کی اور کہا کہ کراچی میں دو سال سے آپریشن ہو رہا ہے اور یہاں سے ہی صرف 8مقدمات فوجی عدالتوں میں بھیجے جارہے ہیں، وزیراعلیٰ نے جواب دیا کہ پراسیکیوشن پر خاص توجہ دی جائیگی۔ ڈی جی رینجرز نے کہا کہ کراچی میں کسی عسکری ونگ کو پیسے اکھٹے نہیں کرنے دیں گے اور اس سال کسی کو قربانی کی کھالوں پر ڈاکا بھی نہیں ڈالنے دینگے۔ آئی جی سندھ نے رشید گوڈیل کی سی سی ٹی وی فوٹیج لندن بھجوانے کے فیصلے سے آگاہ کیا۔ وزیراعظم نے غیر واضح سی سی ٹی وی ویڈیو کا نوٹس لیتے ہوئے خراب کیمرے لگانے والوں کیخلاف کارروائی کا حکم دیا۔