راولپنڈی(نیوز ڈیسک)ماڈل گرل ایان علی پر فرد جرم عائد نہ ہوسکی ، کسٹم عدالت نے نا مکمل چالان پیش کرنے پر سماعت چار ستمبر تک ملتوی کر دی۔ ایان علی کے خلاف منی لانڈرنگ کیس کی سماعت راولپنڈی کی کسٹم عدالت کے جج رانا آفتاب نے کی ، ایان علی اپنے وکیل خرم لطیف کھوسہ کے ہمراہ پیش ہوئیں۔ عدالت کے روبرو پراسیکیوٹر امین فیروز نے اس کیس میں پراپرٹی ڈیلر ممتاز اور اویس کو ملزم قرار دیئے جانے سے متعلق انوسٹی گیشن رپورٹ پڑھ کر سنائی۔ ایان علی کے وکیل نے دلائل دیتے ہوئے کہا کہ کسٹم حکام نے گواہوں کو بھی ملزم بنا دیا ہے ، ایان علی نے چالان میں ردوبدل کو ہائیکورٹ میں چیلنج کر رکھا ہے۔ ہائی کورٹ کے فیصلے تک فرد جرم عائد نہیں کی جا سکتی جس پر عدالت کا کہنا تھا ، نامکمل چالان کی صورت میں ملزمہ پر فرد جرم عائد نہیں ہو سکتی ہے۔ عدالت نے تفتیشی افسر کو ہدایت کی کہ دونوں ملزمان کو گرفتار کر کے انہیں بھی چالان میں شامل کیا جائے جس کے بعد سماعت چار ستمبر تک ملتوی کر دی گئی۔