پشاور(نیوزڈیسک)امیر جماعت اسلامی سینیٹر سراج الحق نے کہاہے کہ آصف زرداری کی تقریر ہلکی پھلکی موسیقی ہے اسے دھمال میں تبدیل نہیں ہوناچاہیے۔انہوں نے کہاکہ ملک کے جمہوری سسٹم کو ایک دفعہ پھر کچھ خطرات لاحق ہونے کی بو محسوس ہورہی ہے۔ سیاست اور جرائم کو الگ رہنا چاہیے اگر کوئی سیاستدان اور اسٹیبلشمنٹ کے کچھ عناصر خود کو قانون اور احتساب سے ماورا سمجھتے ہیں تو ایسے لوگوں کو اپنی سوچ کو بدلناچاہیے۔ ان خیالات کااظہار انہو ں نے پشاور میں کارکنوں سے خطاب کرتے ہوئے کیا۔انہوں نے کہاکہ کوئی فرد جمہوریت کے لیے لازم و ملزوم نہیں ہے۔ خود کو احتساب سے بالاتر سمجھنے کا رویہ تبدیل ہوناچاہیے اور ملک میں آئین و قانون کی بالادستی کو یقینی بنایا جائے۔ انہوں نے کہاکہ اگر کسی فرد کااحتساب ہوتاہے یا وہ قانون کی گرفت میں آتاہے تو اس سے جمہوریت کو خطرہ نہیں ہونا چاہیے۔ انہوں نے کہاکہ پاکستان میں سب سے بڑا مسئلہ اخلاقی بحران کا ہے جب تک ہم اپنے اخلاق کو درست نہیں کر لیتے ، ہمارے اعمال میں بہتری نہیں آ سکتی۔