اسلام آباد (نیوزڈیسک)پاکستان عوامی مسلم لیگ کے سربراہ شیخ رشید نے کہا ہے کہ مذاکرات کا شہنشاہ پٹنے والا ہے، سابق صدر آصف زرداری کے گرد گھیرا تنگ ہورہا ہے۔ایک بیان میں عوامی مسلم لیگ کے سربراہ شیخ رشید احمد نے سابق صدر اور پیپلزپارٹی کے شریک چیئرمین آصف علی زرداری کے دھمکی آمیز خطاب پر شدید تنقید کرتے ہوئے کہا کہ آصف زرداری کے گرد گھیرا تنگ ہورہا ہے، مذاکرات کا شہنشاہ پٹنے والا ہے، سندھ حکومت سے بھی باز پرس کی جائے۔انہوںنے کہاکہ آصف زرداری کو نواز شریف کی حمایت نہیں ملے گی، وہ موجودہ صورتحال سے جان چھڑانے کیلئے وکٹ کے دونوں طرف کھیلیں گے، سپورٹ نہ ملنے پر پیپلزپارٹی کے شریک چیئرمین اپوزیشن کی طرف جائیں گے شیخ رشید احمد نے کہاکہ آصف زرداری نے ہیرو بننے کی ناکام کوشش کی تاہم زیرو کبھی ہیرو نہیں ہوتاانہوںنے کہا کہ آصف زرداری نے لوٹ مار اور کرپشن کے اعزاز میں 8 سال جیل کاٹی۔ انہوں نے کہا کہ رینجرز نے مختلف اپیکس کمیٹیوں میں جو بیانات دیئے اس سے ایسا لگتا تھا کہ سندھ حکومت ٹس سے مس نہیں ہوئی جس پر رینجرز حکام کو انتہائی اقدام اٹھانا پڑا میں نہیں سمجھتا کہ کراچی سے خیبر تک پی پی پی کا کوئی عمل دخل رہ گیا ہے۔انہوں نے کہا کہ نواز شریف نے آصف علی زرداری سے ملاقات نہ کر کے بہتر کیا، ان کو پتہ تھا کہ یہ ڈوبتا آدمی ہے ہاتھ پکڑ کر ان کو بھی ڈبوانا چاہتا ہے میرا خیال ہے کہ رمضان المبارک کے بعد سیاست میں بہت بڑی ہلچل ہونے والی ہے۔