اسلام آباد (نیوز ڈیسک ) اسلام آباد ہائیکورٹ کی ہراسمنٹ کمیٹی کی سربراہی میں ردوبدل کر دیا گیا ہے۔چیف جسٹس اسلام آباد ہائیکورٹ سردار سرفراز ڈوگر کے حکم پر جسٹس ثمن رفعت امتیاز کو کمیٹی کی سربراہی سے ہٹا دیا گیا، اور ان کی جگہ جسٹس انعام امین منہاس کو نیا سربراہ مقرر کیا گیا ہے۔ ذرائع کے مطابق اس فیصلے کی تحریری وجوہات بھی سامنے لائی جائیں گی۔
ایڈووکیٹ ایمان مزاری کی درخواست موصول ہونے کے بعد جسٹس ثمن رفعت امتیاز نے بطور سربراہ ایک تین رکنی کمیٹی تشکیل دی تھی، جس میں جسٹس سردار اعجاز اسحاق خان اور جسٹس ارباب محمد طاہر بھی شامل تھے۔ اس کمیٹی کا مقصد ججز سے متعلق شکایات کی سماعت تھا، لیکن سربراہ کی تبدیلی کے بعد یہ کمیٹی غیر مؤثر ہوگئی ہے۔یاد رہے کہ گزشتہ روز ایڈووکیٹ ایمان مزاری نے چیف جسٹس سرفراز ڈوگر کے خلاف ہراسمنٹ کمیٹی میں باضابطہ شکایت دائر کی تھی۔ اپنی درخواست میں ان کا مؤقف تھا کہ چیف جسٹس کی جانب سے ہراسانی کے معاملے کو سپریم جوڈیشل کونسل کو بھیجا جانا چاہیے۔یہ شکایت اس وقت سامنے آئی جب کمرہ عدالت میں ایمان مزاری اور چیف جسٹس کے درمیان تلخ جملوں کا تبادلہ ہوا تھا۔
