اسلام آباد (نیوز ڈیسک) پاکستان تحریک انصاف کے بانی عمران خان نے اڈیالہ جیل میں اپنے وکلاء اور پارٹی رہنماؤں سے گفتگو کرتے ہوئے ایک بار پھر دوٹوک مؤقف اختیار کرتے ہوئے کہا کہ اُنہیں دو سال قبل یہ کہا گیا تھا کہ تین سال تک سیاست سے پیچھے ہٹ جائیں اور نظام کو چلنے دیں، مگر انہوں نے یہ مشورہ مسترد کر دیا۔ ان کا کہنا تھا: ’’میں کسی یزید صفت حکمران کے کہنے پر تین لمحے بھی خاموش نہیں بیٹھ سکتا، تین سال تو دور کی بات ہے۔‘‘عمران خان نے انکشاف کیا کہ ان پر آئینی ترمیم نمبر 26 کو تسلیم کرنے کے لیے دباؤ ڈالا جا رہا ہے، لیکن وہ اسے آئین و قانون کی حکمرانی کے خلاف سمجھتے ہیں۔
انہوں نے کہا کہ ان کی جدوجہد اصولوں کے لیے ہے اور وہ کسی ایسے اقدام کی حمایت نہیں کریں گے جو بنیادی انسانی حقوق کو پامال کرتا ہو۔انہوں نے 9 مئی کے واقعات پر معافی مانگنے کے مطالبے کو بھی سختی سے رد کرتے ہوئے کہا کہ معافی ان افراد کو مانگنی چاہیے جنہوں نے عوامی حقوق کی خلاف ورزی کی، گھروں میں چڑھائیاں کیں، خواتین کی تذلیل کی، اور سیاسی کارکنوں کو ماورائے عدالت سزائیں دیں۔”انصاف کا دروازہ بند ہو چکا ہے”چیئرمین پی ٹی آئی نے کہا کہ اگر نو مئی کے مقدمات کی صرف ایک گھنٹے کی سماعت بھی میرٹ پر کر لی جائے تو یہ سب جھوٹے مقدمات فوری ختم ہو سکتے ہیں۔
تاہم، انہوں نے افسوس کا اظہار کرتے ہوئے کہا کہ نہ صرف انصاف نہیں ہو رہا بلکہ انصاف ہوتا ہوا نظر بھی نہیں آ رہا۔انہوں نے نبی کریم ﷺ کی جدوجہد کا حوالہ دیتے ہوئے کہا کہ ہمیں بھی بحیثیت قوم استقامت اور صبر کے ساتھ اس ظلم کا مقابلہ کرنا ہو گا، کیونکہ قومیں ظلم سے نہیں مٹتیں بلکہ وہ از سر نو بنتی ہیں۔بجلی جیسا سلوک خواتین کے ساتھ؟عمران خان نے کہا کہ ان کی اہلیہ بشریٰ بی بی گزشتہ 14 ماہ سے بغیر کسی ثابت شدہ الزام کے تنہائی میں قید ہیں۔ ڈاکٹر یاسمین راشد جیسی کینسر سے لڑنے والی بزرگ خاتون کو جھوٹے مقدمات میں قید کر لیا گیا۔ انہوں نے مزید کہا کہ ان کی عمر رسیدہ بہنوں کو، جو عدالتی حکم کے مطابق ان سے ملنے آتی ہیں، ایک کرنل روک دیتا ہے اور عدالتی احکامات ردی کی ٹوکری کی نذر کر دیے جاتے ہیں۔آئین کی پامالی اور 26ویں ترمیم کی مخالفتعمران خان نے 26ویں آئینی ترمیم کو عدلیہ کو مفلوج کرنے کی سازش قرار دیا۔
ان کے مطابق اس ترمیم کا اصل مقصد دو باتیں ہیں: ایک، دھاندلی زدہ انتخابات کو تحفظ دینا، اور دوسرا، تحریک انصاف کے قائدین اور کارکنوں کو جیل میں قید رکھنا تاکہ کسی بھی احتساب سے بچا جا سکے۔ان کا کہنا تھا کہ اب عدلیہ اس حد تک بے بس ہو چکی ہے کہ اعلیٰ ججز اپنے عدالتی اختیارات بھی استعمال نہیں کر پا رہے۔ ’’میرے کیسز جان بوجھ کر التوا کا شکار کیے جا رہے ہیں۔ کبھی بینچ مکمل نہیں ہوتا، تو کبھی سماعت ملتوی کر دی جاتی ہے۔‘‘”میرے ساتھ عام قیدی جیسا بھی سلوک نہیں”عمران خان نے جیل میں اپنے ساتھ ہونے والے سلوک پر شدید تحفظات کا اظہار کرتے ہوئے کہا کہ انہیں جیل مینوئل کے مطابق حاصل بنیادی سہولیات بھی فراہم نہیں کی جاتیں۔ ان کا کہنا تھا کہ نہ ان کی اہلیہ سے ملاقات کی اجازت دی جاتی ہے، نہ بچوں سے بات چیت کروائی جاتی ہے، حتیٰ کہ ان کی کتابیں بھی ضبط کر لی جاتی ہیں تاکہ وہ ذہنی طور پر ٹوٹ جائیں۔عوام اور کارکنان کے نام خصوصی پیغامانہوں نے پارٹی کارکنان اور سوشل میڈیا ٹیموں کو ہدایت کی کہ تنقید کا نشانہ پارٹی کے اپنے افراد نہ بنیں بلکہ اصل توجہ فسطائی قوتوں پر مرکوز رکھی جائے۔ ’’ہماری جنگ باہر والوں سے ہے، اندر سے ٹوٹنے کی اجازت نہیں دی جا سکتی۔
‘‘انہوں نے کہا کہ تحریک انصاف کی تنظیم نو کے عمل میں عالیہ حمزہ اور چاروں ریجنز کے صدور کو شامل کیا جائے اور سب عہدیداران برابری کی سطح پر مل کر کام کریں۔ غیر فعال عہدیداران کو برطرف کیا جائے گا۔”سمبڑیال الیکشن میں بھرپور شرکت کریں”عمران خان نے سمبڑیال کے ضمنی انتخاب کو اہم موقع قرار دیا اور عوام سے بھرپور شرکت کی اپیل کرتے ہوئے کہا: ’’یہ وقت ہے ووٹ کی طاقت کے ذریعے ظلم کا جواب دینے کا۔ فارم 45 لے کر پولنگ اسٹیشن سے باہر آئیں اور فارم 47 کے اجرا تک گنتی کے ہر مرحلے پر نظر رکھیں۔‘‘ان کا کہنا تھا کہ شریف خاندان نے ہمیشہ این آر او لیا اور اب چوری شدہ انتخابات کے ذریعے دوبارہ مسلط ہو چکے ہیں، مگر وقت آ گیا ہے کہ قوم اپنی خودداری کے لیے کھڑی ہو۔
