اسلام آباد (این این آئی)سفارتی ذرائع نے کہا ہے کہ ایشیا پیسیفک گروپ میں پاکستان کا درجہ کم کرانے کی بھارتی کوششیں ناکام ہو گئی ہیں۔ذرائع کے مطابق بھارت نے ایشیا پیسیفک گروپ میں پاکستان کا درجہ کم کرانے کے لئے ایڑی چوٹی کا زور لگایا تاہم اسے مکمل ناکامی ہوئی۔سفارتی ذرائع کے مطابق ایشیا پیسیفک گروپ کسی ملک کو بلیک لسٹ کرنے کا اختیار نہیں رکھتا، اس حوالے سے بھارتی ذرائع

ابلاغ میں چلنے والی تمام خبریں بے بنیاد ہیں۔ذرائع کے مطابق بھارتی میڈیا کی جانب سے پاکستان کے خلاف غلیظ پراپیگنڈہ کیا جا رہا ہے۔واضح رہے کہ بھارتی میڈیا میں پاکستان کا درجہ کم کرنے کے بارے میں مسلسل رپورٹس چل رہی تھیں، کئی میڈیا چینلز نے یہ مذموم مہم چلائی ہوئی تھی کہ پاکستان کو بلیک لسٹ کر دیا گیا ہے جس کی پاکستان کے سفارتی ذرائع نے تردید کر کے اس پراپیگنڈے کی ہوا نکال دی ہے۔جبکہ دوسری جانب ترجمان وزارت خارجہ نے کہا ہے کہ پاکستان کے بارے میں ایف اے ٹی ایف ایشیا پیسیفک گروپ کی میڈیا رپورٹس بے بنیاد اور غلط ہیں ۔تفصیلات کے مطابق فنانشل ایکشن ٹاسک فورس کے ایشیاء پیسفک گروپ کا بائیسواں سالانہ اجلاس آسٹریلیا میں منعقد ہوا ،جو 18 سے 23 اگست تک جاری رہااجلاس میں 46 جوریسڈکشن سے 520 سینئر اراکین اور 13 بین الاقوامی تنظیموں کے وفود نے شرکت کی۔ ذرائع کے مطابق اجلاس میں بھارت کی جانب سے ایک مرتبہ پھر پاکستان کو نیچا دکھانے کی بھرپور کوشش کی گئی۔ ذرائع نے بتایاکہ بھارت کی یہ کوشیش پاکستان کی جانب سے مکمل ہوم ورک کرنے اور کارکردگی دکھانے کے باعث ناکام ہوگئی۔ ذرائع کے مطابق بھارت کو ایشیاء پیسفک گروپ کے اجلاس میں بری طرح منہ کی کھانا پڑی۔ذرائع کے مطابق ایشیاء پیسفک گروپ کیندورہ سے کسی بھی ملک کو بلیک لسٹ قرار نہیں دیا جا سکتا۔ ذرائع نے بتایاکہ بھارتی میڈیا میں آنے والی رپورٹس بے بنیاد ہیں،حقیقت سے دور یہ رپورٹس بھارت کے پاکستان کے خلاف مذموم پروپیگنڈا مہم کا حصہ ہیں۔ وزارت خارجہ کے ترجمان ڈاکٹر محمد فیصل نے کہاکہ پاکستان کے بارے میں ایف اے ٹی ایف ایشیا پیسیفک گروپ کی میڈیا رپورٹس بے بنیاد اور غلط ہیں۔