لاہور (مانیٹرنگ ڈیسک) پاکستانی وزیراعظم شاہد خاقان عباسی کو امریکہ کے ائیرپورٹ پر سخت سکیورٹی مراحل سے گزرنا پڑا، وزیراعظم پاکستان کی ائیرپورٹ میں سکیورٹی مراحل سے گزرنے کی ویڈیو سوشل میڈیا پر وائرل ہو چکی ہے، واضح رہے کہ پاکستان کے وزیراعظم شاہد خاقان عباسی گزشتہ دنوں امریکہ گئے تھے جہاں انہیں ائیرپورٹ پر سخت سکیورٹی مراحل سے گزرنا پڑا۔ سوشل میڈیا پر وائرل ہونے والی اس ویڈیو میں دیکھا جا سکتا ہے کہ وزیراعظم شاہد خاقان عباسی جان ایف کینیڈی ائیرپورٹ پر سکیورٹی مراحل کے بعد بیگ اور کوٹ اٹھا کر جاتے دیکھا جا سکتا ہے۔
اس ویڈیو کے وائرل ہونے کے بعد سوشل میڈیا پر ایک صارف نے اپنا تبصرہ کرتے ہوئے کہاکہ ایک ملک کا وزیراعظم ہوتے ہوئے بھی شاہد خاقان عباسی کی چیکنگ کی گئی اور انہیں سخت سکیورٹی مراحل سے گزرنا پڑا جو پاکستان کے وزیراعظم کی توہین ہے۔ یاد رہے کہ اس سے قبل وزیراعظم شاہد خاقان عباسی نے دورہ امریکہ کے دوران غیر متوقع طور پر امریکی نائب صدر مائیکل پینس سے ملاقات کی اور افغانستان میں مذاکرات کے ذریعے تنازعات کا حل تلاش کرنے پر تبادلہ خیال کیا۔ ایک نجی ٹی وی چینل نے اپنی رپورٹ میں بتایا کہ یہ ملاقات پاکستان کی درخواست پر امریکی نائب صدر کے گھر پر ہوئی اور یہ ملاقات تیس منٹ تک جاری رہی اور اس ملاقات میں مائیکل پینس کے خصوصی مشیر برائے جنوبی ایشیائی امور مائیکل کٹرون نے بطور نوٹ ٹیکر شرکت کی، تاہم دونوں رہنماؤں کی ملاقات کے دوران ان کے علاوہ کوئی بھی امریکی یا پاکستانی عہدیدار موجود نہیں تھا۔ وزیر اعظم پاکستان شاہد خاقان عباسی اور امریکی نائب صدر مائیکل پینس کے درمیان ہونے والی اس ملاقات میں دونوں رہنماؤں نے افغانستان پر اپنے نقطہ نظر کی وضاحت کی۔ نجی ٹی وی چینل کا کہنا ہے کہ وزیراعظم پاکستان کی طرف سے امریکی نائب صدرکو افغانستان میں امن کی کوششوں کے لیے پاکستان کے مخلصانہ عزم کی یقین دہانی کرائی، ساتھ ہی دہشت گردی کے خلاف جنگ میں پاکستان کی کامیابیوں پر بھی زور دیا۔
