بیجنگ ( آن لائن) چین نے کہا ہے کہ کورونا وائرس کی ابتدا اور پھیلاوَ کے بارے میں تحقیقات قبل از وقت اقدام ہو گا۔ اس وقت وبا کے خلاف جنگ اور تعاون اہم اور ترجیح ہے۔چینی وزارت خارجہ نے اپنے جاری کردہ بیان میں کورونا وائرس سے متعلق کہا ہے کہ بیشتر ملکوں کا ماننا ہے کہ ابھی کورونا وبا کا خاتمہ نہیں ہوا اور اس وقت وبا کے خلاف جنگ اور تعاون اہم اور ترجیح ہے۔
غیر ملکی خبر رساں ادارے کے مطابق چینی حکومت نے ووہان کے تمام اضلاع کو ٹیسٹ پلان مرتب کرنے کی ہدایت جاری کرتے ہوئے کہا کہ 10 روز میں ووہان کے شہریوں کے ٹیسٹ کیے جائیں گے۔ ووہان سے پھوٹنے والی وبا سے چین سمیت دنیا بھر میں ہزاروں ہلاکتیں ہوئی ہیں، اب تک دنیا بھر میں اموات کی تعداد 3 لاکھ سے تجاوز کر گئی ہے۔گزشتہ دنوں چینی حکومت نے ووہان شہر میں دوبارہ کورونا کیسز سامنے آنے کے بعد ایک کروڑ 10 لاکھ پر مشتمل آبادی کا ٹیسٹ کرنے کا فیصلہ کیا۔چین میں پابندیوں میں نرمی اور کاروبار کھلنے کے بعد کورونا وائرس کے نئے کیسز سامنے آنے کے بعد حکام بہت زیادہ فکر مند ہو گئے ہیں۔ ووہان ہیلتھ حکام کا کہنا ہے کہ شہر میں کورونا کے خلاف اقدامات ابھی بھی سخت ہیں۔ ہمیں اس وبا کو دوبارہ پھیلنے سے روکنے کے لیے چوکنا رہنا ہو گا۔
