تہران (این این آئی)ایران کے دارالحکومت تہران میں ایک یونیورسٹی کے طلباء کا احتجاجی مظاہرہ حکومت مخالف احتجاج میں بدل گیا۔ مظاہرین نے ملاؤں کی حکومت مردہ باد کے نعرے لگا دئیے۔عرب ٹی وی کے مطابق دارالحکومت تہران میں قائم آزاد سائنس و ریسرچ یونیورسٹی کے احاطے میں طلباء کی بڑی تعداد نے جمع ہو کر حکومت کی طرف سے عاید کردہ پابندیوں کے خلاف مظاہرہ کیا۔ موقع پر مظاہرین کے حکومت کے خلاف نعروں کی فوٹیج اور تصاویر سوشل میڈیا پر بھی
پوسٹ کی گئی ہیں۔ طلباء کو ملاؤں کی حکومت مردہ باد کے نعرے لگاتے سنا جاسکتا ہے۔دارالحکومت کے وسط میں ہونے والے ان مظاہروں میں طلباء نے جامعہ کے چانسلر علی اکبر ولایتی کو برطرف کرنے کا مطالبہ کیا اور کہا کہ ولایتی اور دیگر عہدیدار ایک بس حادثے کا موجب بنے ہیں جس کے نتیجے میں10 طلباء جاں بحق اور 28 زخمی ہوگئے تھے۔ طلباء کا کہنا تھا کہ حکومت نے طلباء کے تحفظ کے لیے کسی قسم کے اقدامات نہیں کیے اور نہ ہی بس حادثے کی تحقیقات کرائی ہیں۔