بیجنگ(آئی این پی)بھارتی فوجی خطرے کا مقابلہ کرنے کیلئے چین نے تبت میں اپنا فضائی دفاع مزید مضبوط بنانا شروع کردیا ہے ۔چین نے اپنی ویسٹرن تھیٹر کمانڈ کا دفاعی نظام بہتر بنانے کیلئے لائن آف ایکچوئل کنٹرول (ایل اے سی)کیساتھ اپنا فضائی دفاع بہتر بنانا شروع کردیا ہے تا کہ اس علاقے میں بھارتی خطرے کا مقابلہ کیا جاسکے ۔چین کے معروف اخبار گلوبل ٹائمز کے مطابق علاقے کی لی گئی

تصاویر سے یہ واضح ہوتا ہے کہ گزشتہ دنوں چین نے جے 10اورجے11جنگی طیاروں کی اس علاقے میں مشقیں کیں جن پر تبصرہ کرتے ہوئے چینی عسکری ماہرین اور ٹی وی کے تبصرہ نگار سانگ ژانگ پنگ نے کہا کہ چین کیلئے یہ ضروری ہے کہ وہ اس پہاڑی علاقے میں اپنی فضاؤں کو مزید محفوظ بنانے کیلئے نمایاں اقدامات کرے ۔ویسٹرن تھیٹر کمانڈ کے پاس 3.5جنریشن فائٹر جدید جنگی طیارے موجود ہیں اور پہلے اس قسم کی کارروائی جنوبی اور مشرقی تھیٹر کمانڈ کے علاقے میں بھی کی گئی تھی ۔ یہ جیٹ طیارے پیپلزلبریشن آرمی ویسٹرن تھیٹر کمانڈ کے تحت ایئرفورس کی ایوی ایشن بریج کیساتھ منسلک کئے گئے ہیں ۔یہ معلومات پیپلزلبریشن آرمی کی ویب سائٹ پر جاری کی گئی ہیں ۔ چین کی ویسٹرن تھیٹر کمانڈ بھارتی سرحد کیساتھ پہاڑی جنگی علاقوں کے دفاع کی ذمہ دار ہے ۔ تبت کے علاقوں میں ایل اے سی 3488کلومیٹرطول بلد میں واقع ہے ۔سانگ ژانگ پنگ کا کہنا ہے کہ اس علاقے میں چین کے تیسری جنریشن کے جو جنگی طیارے موجود ہیں وہ بھارت کی طرف سے پیدا ہونے والی کسی بھی صورتحال کا مقابلہ کر سکتے ہیں ۔