سرینگر(این این آئی) مقبوضہ کشمیر کے ضلع اسلام آباد کے علاقے قاضی گنڈ میں مسلمانوں نے پنڈت مہاراج کشن کول المعروف کاکا بٹ کی آخری رسومات انجام دیں۔ کشمیر میڈیا سروس کے مطابق مقامی لوگوں نے سرینگر سے شائع ہونے والے اردو روزنامے ’’کشمیر عظمیٰ‘‘ کو بتایا کہ پنڈٹ مہاراج کشن کول اپنے اہلخانہ کے ہمراہ قاضی گنڈ کے گاؤں لیوڈورہ میں مقیم تھا اور جمعرات کی رات طبیعت اچانک خراب ہونے کے بعد مسلمان پڑوسیوں نے انہیں ہسپتال پہنچایا جہاں وہ فوت ہو گیا۔
انہوں نے کہا کہ مہاراج کشن کی موت کی خبر گاؤں میں پھیلتے ہی مسلمان آنجہانی کے گھر پہنچے اور بعد ازاں ہندو مذہب کے مطابق انکی آخری رسومات انجام دیں۔آنجہانی نے سوگوران میں اہلیہ ، دو بیٹے اور دو بیٹیاں چھوڑے۔ گاؤں کے لوگوں نے مزید کہا کہ لیوڈورہ میں کم از کم چالیس پنڈٹ گھرانے آباد تھے تاہم 1990میں مہاراج کشن اور انکے اہلخانہ کے سوا تمام پنڈت یہاں سے جموں منتقل ہو گئے تھے۔ یا درہے کہ 1990میں اس وقت کے مقبوضہ کشمیر کے گورنر جگموہن نے تحریک آزادی کو فرقہ وارانہ کشیدگی کا رنگ دینے کے مذموم ارادے کے تحت کشمیری پنڈتوں کو زبردستی مقبوضہ وادی چھوڑنے پرمجبور کیا تھا ۔
