براتیسلوا (این این آئی)فرانس اور جرمنی نے کہا ہے کہ یورپی یونین نے ان ترجیحات پر اتفاق کر لیا ہے جن کی مدد سے اس تنظیم کو برطانیہ کی علیحدگی کے فیصلے سے پیدا ہونے والی سنگین صورتِ حال کے باوجود نئی زندگی بخشی جا سکتی ہے۔ میڈیا رپورٹ کے مطابق جرمنی اور فرانس کے رہنماؤں نے سلواکیہ کے دارالحکومت براتیسلوا میں ہونے والے سربراہی اجلاس کے بعد اتحاد کی علامت کے طور پر مشترکہ پریس کانفرنس منعقد کی۔یہ 27 رکنی یورپی یونین کی برطانیہ کے بغیر پہلا اہم اجلاس تھا۔جرمن چانسلر انگیلا میرکل اور فرانسیسی صدر فرانسوا اولاند نے اس موقع پر کہا کہ پناہ گزینوں کا بحران ایک کلیدی معاملہ ہے۔صدر اولاند نے کہاکہ ہم نے کسی چیز سے نظریں نہیں چرائیں۔ ہم نے فیصلہ کیا ہے کہ ہمیں پناہ گزینوں کے معاملے سے مشترکہ طور پر نمٹنا ہو گا اور ساتھ ہی سیاسی پناہ حاصل کرنے کے حق کا پاس بھی رکھنا ہو گا۔پناہ گزینوں کے بڑی تعداد میں یورپ پہنچنے کے معاملے پر سخت اختلافات ہیں اور سلوواکیا ٗہنگری، چیک رپبلک اور پولینڈ نے یورپی یونین کی جانب سے پناہ گزینوں کے لیے مختص کوٹا قبول کرنے سے انکار کر دیا ہے۔چانسلر میرکل نے کہاکہ ہم نے پناہ گزینوں کے مسئلے پر ٹھوس گفتگو کی۔ ہمیں مفاہمت سے معاملہ سلجھانا ہو گا۔ ہم نے اتفاق کیا کہ یورپ کو بریکسٹ (برطانیہ کی یورپی یونین سے علیحدگی) کے بعد سے سنگین صورتِ حال کا سامنا ہے، اس کے علاوہ بھی ایسے مسائل ہیں جنھیں مل جل کر حل کرنا پڑیگا۔