لاہور( این این آئی) رواں مالی سال کے پہلے دو ماہ میں دیار غیر میں بسنے والے پاکستانیوں نے 3ارب ڈالر اپنے ملک بھجوائے ۔رپورٹ کے مطابق عالمی منڈی میں تیل کی کم قیمتوں نے جہاں خلیجی ممالک کو پریشان کر رکھا ہے وہی تیل کی پیداوار ی کمپنیاں بند ہونے سے کئی پاکستانی بھی بے روز گار ہو چکے ہیں جس کے باعث آئندہ آنے والے دنوں میں ترسیلات زر میں کمی کا خدشہ بڑھتا چلا جا رہا ہے ۔ جولائی سے اگست کے دروان بیرون ممالک مقیم پاکستانیوں نے 3 ارب پاکستان بھجے جبکہ گزشتہ سال کے اسی عرصے کے دوران 3 ارب 19 کروڑ ڈالر پاکستان بھجوائے گئے ۔ تجزیہ کاروں کے مطابق ملکی درآمدات اور سرمایہ کاری پہلے ہی کم ہے اگر ترسیلات زر میں کمی واقع ہوئی تو حکومت کا ملکی معیشت کا پہیہ چلانے کے لئے عالمی مالیاتی اداروں اور مرکزی بینک پر انحصار بڑھ جائے گا جس سے مہنگائی کی شرح میں تیزی سے اضافہ ہو گا اس لئے حکومت کو جلد از جلد خلیجی ممالک سے رابطہ کر کے پاکستانیوں کے مسائل حل کرنے کی ضرورت ہے۔