ماسکو(این این آئی) روس میں دریا کا رنگ خونی ہو گیا،ملک بھر میں خوف و ہراس پھیل گیا،روس میں وزارت ماحولیات نے اعلان کیا ہے کہ شمالی شہر نوریلسک کے قریب بہنے والے دریائے ڈالڈیکان کا پانی سْرخ رنگ میں تبدیل ہوجانے کی وجوہات جاننے کے لیے تحقیقات کی جائیں گی۔ اس بات کا امکان ظاہر کیا گیا ہے کہ اس کا سبب کوئی صنعتی حادثہ ہوسکتا ہے۔میڈیارپورٹس کے مطابق وزارت نے جاری ایک بیان میں بتایا کہ اسے مذکورہ علاقے کی آبادی کی جانب سے یہ شکایات موصول ہوئیں کہ دریائے ڈالڈیکان کا پانی کسی کیمیائی مواد سے آلودہ ہوگیا ہے جس کے نتیجے میں پانی کا رنگ سرخ ہوگیا ہے۔وزارت ماحولیات کا مزید کہناتھا کہ ابتدائی معلومات کے مطابق غالب گمان ہے کہ آلودگی کی وجہ نوریلسک میں ایک نیکل پلانٹ کی پائپ لائنیں پھٹنا ہے۔ شمالی سائبیریا میں واقع اس شہر کی آبادی 1 لاکھ 70 ہزار نفوس پر مشتمل ہے۔مقامی ماحولیاتی کارکنوں کی جانب سے انٹرنیٹ پر جاری تصاویر میں جنگلوں کے بیچ سے گزرتے اس دریا کا سرخ رنگ کا پانی نظر آرہا ہے۔