ریاض (مانیٹرنگ ڈیسک) اس جمعۃ المبارک یعنی 15جولائی 201ء کو دوپہر کے وقت سورج کعبۃ اللہ کے عین اوپر ہو گا اور یہ وقت قبلہ کی درست سمت کے تعین کے لئے سنہری موقع ہو گا۔ رواں سال کے دوران یہ موقع دوسری اور آخری مرتبہ آرہا ہے۔عرب نیوز کی رپورٹ کے مطابق جمعۃ المبارک کو سعودی عرب کے مقامی وقت کے مطابق دوپہر 12 بجکر 27 منٹ پر سورج کعبۃ اللہ کے عین اوپر ہو گا۔ پاکستان میں یہ وقت2 بجکر 27 منٹ ہو گا۔ جب سورج کعبۃ اللہ کے عین اوپر ہو گا تو جغرافیائی لحاظ سے مکہ سے دور دراز کے خطوں میں بسنے والے لوگ قبلہ کی درست سمت کا تعین کر سکتے ہیں۔ اس کا آسان طریقہ یہ ہے کہ اگر ایک چھڑی کو زمین پر عمودی طور پر نصب کیا جائے، یعنی اس کا بالائی سرا آسمان کی جانب ہو، تو سعودی وقت کے مطابق 12 بجکر 27 منٹ پر قبلہ کی سمت اس چھڑی کے سائے سے عین مخالف سمت میں ہو گی۔