اسلام آباد (نیوز ڈیسک) وزیراعظم فیول ریلیف اسکیم کے ذریعے کم قیمت پر پٹرول حاصل کرنے کے خواہشمند شہریوں کے لیے اہم پیش رفت سامنے آگئی ہے۔
نائب وزیراعظم اسحاق ڈار نے متعلقہ حکام کو رجسٹریشن کا طریقہ کار آسان بنانے اور اسے عام شہریوں کے لیے زیادہ سے زیادہ قابل رسائی رکھنے کی ہدایت کردی۔
فیول ریلیف اسکیم کے انتظامی معاملات کا جائزہ لینے کے لیے اسحاق ڈار کی زیر صدارت اجلاس ہوا، جس میں اسکیم پر عملدرآمد، رجسٹریشن اور عوامی آگاہی سمیت مختلف امور پر بریفنگ دی گئی۔
نائب وزیراعظم نے ہدایت کی کہ پٹرول پمپس پر اسکیم کے مؤثر نفاذ کو یقینی بنایا جائے، جبکہ شہریوں کو ریلیف پروگرام کے طریقہ کار اور رجسٹریشن کے حوالے سے مکمل معلومات بھی فراہم کی جائیں۔
اجلاس میں اسحاق ڈار نے منتخب نمائندوں کو بھی ہدایت کی کہ وہ اپنے حلقوں کے عوام کو وزیراعظم فیول ریلیف اسکیم سے متعلق آگاہ کریں اور اہل افراد کو رجسٹریشن کے عمل میں سہولت فراہم کریں۔
انہوں نے وزیراعظم یوتھ پروگرام کے رضاکاروں کو بھی عوامی رابطے اور رجسٹریشن میں معاونت کے لیے استعمال کرنے کی ہدایت دی، تاکہ زیادہ سے زیادہ مستحق شہری اسکیم سے فائدہ اٹھا سکیں۔
اجلاس کو بتایا گیا کہ وزیراعظم فیول ریلیف اسکیم کا آغاز اسلام آباد میں ہوچکا ہے، جبکہ 16 ستمبر کی رات 11 بج کر 59 منٹ کے بعد یہ پروگرام ملک بھر میں فعال کردیا جائے گا۔ وزیراعظم شہباز شریف کی ہدایات کے مطابق اسکیم پر عملدرآمد کے لیے متعلقہ ادارے اقدامات کر رہے ہیں۔
اجلاس میں وفاقی وزیر اطلاعات و نشریات، وزیر آئی ٹی، وزیر پارلیمانی امور، وزیر مملکت برائے خزانہ، وزیراعظم کے معاون خصوصی، سیکریٹری آئی ٹی اور اسلام آباد سے تعلق رکھنے والے ارکان قومی اسمبلی سمیت دیگر متعلقہ حکام نے شرکت کی۔
