اسلام آباد(نیوز ڈیسک)پیٹرول اور ڈیزل کی قیمتوں میں مسلسل اضافے کے اثرات عام شہریوں تک پہنچنے لگے ہیں، جس کے باعث غریب اور متوسط طبقے کو روزمرہ اخراجات پورے کرنے میں مزید مشکلات کا سامنا ہے۔

نجی ٹی وی سماء نیوز کے مطابق کوئٹہ میں گزشتہ ایک ہفتے کے دوران آٹے کے نرخوں میں نمایاں اضافہ ہوا ہے۔ 20 کلو آٹے کا تھیلا 400 روپے مہنگا ہونے کے بعد اس کی قیمت 2 ہزار 800 روپے سے بڑھ کر 3 ہزار 200 روپے ہوگئی ہے۔اسی طرح 50 کلو آٹے کی بوری کی قیمت میں بھی 1 ہزار روپے کا اضافہ ریکارڈ کیا گیا، جس کے بعد نئی قیمت 8 ہزار روپے تک پہنچ گئی ہے۔ فی کلو آٹے کے نرخ میں بھی ایک ہفتے کے دوران 20 روپے اضافہ ہوا ہے۔دکانداروں کا کہنا ہے کہ آٹے کی قیمت بڑھنے سے شہریوں کے لیے مہنگائی کا دباؤ مزید بڑھ گیا ہے،

جبکہ گھریلو بجٹ بھی متاثر ہو رہا ہے۔دوسری جانب مہنگائی میں مسلسل اضافے کے اثرات ہفتہ وار سستے بازاروں میں بھی واضح ہونے لگے ہیں۔ اسلام آباد میں پھلوں اور سبزیوں کی قیمتوں میں اضافے کے باعث شہریوں کو روزمرہ اشیائے خورونوش کی خریداری میں بھی مشکلات پیش آرہی ہیں۔