اسلام آباد (نیوز ڈیسک) ملتان سے جدہ جانے والی پی آئی اے کی پرواز میں سگریٹ لے جانے کے الزام میں کسٹمز حکام نے پانچ فضائی میزبانوں کو روک لیا۔
ذرائع کے مطابق واقعہ 9 ستمبر کو ملتان سے جدہ روانہ ہونے والی پی کے 739 پرواز کے دوران پیش آیا، جہاں کسٹمز حکام نے عملے کے سامان کی تلاشی کے دوران سگریٹ برآمد کرکے قبضے میں لے لیے۔
روکے جانے والے فضائی عملے میں فلائٹ پرسر عزرا جمیل، فلائٹ پرسر امتیاز، فضائی میزبان قدسیہ عدنان، وقاص شاہ اور عظمیٰ غضنفر شامل ہیں۔
ذرائع کا کہنا ہے کہ واقعے کی اطلاع پی آئی اے ویجلنس کی جانب سے اعلیٰ حکام کو دے دی گئی ہے، جس کے بعد متعلقہ عملے کے خلاف کارروائی کا عمل شروع کردیا گیا ہے۔
پی آئی اے ترجمان کے مطابق ادارے کے قواعد و ضوابط کے تحت دورانِ ڈیوٹی کریو ممبران کو سگریٹ اپنے ساتھ لے جانے کی اجازت نہیں۔ ترجمان نے بتایا کہ ضابطے کی خلاف ورزی پر پانچوں فضائی میزبانوں کے خلاف سخت انضباطی کارروائی شروع کردی گئی ہے۔
