اسلام آباد (نیوز ڈیسک) سولر صارفین اب اپنی نیٹ میٹرنگ سے متعلق درخواست کی تازہ صورتحال آن لائن پورٹل کے ذریعے باآسانی معلوم کرسکیں گے۔

اس اقدام کا مقصد درخواست گزاروں کو براہ راست معلومات فراہم کرنا اور نظام میں شفافیت کو بہتر بنانا ہے۔تفصیلات کے مطابق وزیر توانائی اویس لغاری کی ہدایت پر نیٹ میٹرنگ سے نیٹ بلنگ نظام میں منتقلی کے لیے زیر التوا درخواستوں پر کارروائی تیز کردی گئی ہے۔ پاور ڈویژن کے مطابق مجموعی طور پر 16 ہزار 654 درخواستیں زیر التوا تھیں، جن میں سے 11 ہزار 695 صارفین سے پاکستان انفارمیشن ٹیکنالوجی کمپنی (PITC) نے براہ راست رابطہ کیا۔حکام کا کہنا ہے کہ متعلقہ صارفین کو پیغامات اور واٹس ایپ کے ذریعے درخواستوں سے متعلق آگاہ کیا گیا، جبکہ اب شہری آن لائن پورٹل پر جاکر اپنی درخواست کی موجودہ حیثیت اور پیش رفت بھی دیکھ سکتے ہیں۔پاور ڈویژن کے ترجمان نے شہریوں کو خبردار کیا ہے کہ درخواست کی جلد کارروائی یا کسی بھی مرحلے پر سہولت فراہم کرنے کے نام پر کسی شخص یا ایجنٹ کو رقم ادا نہ کریں۔

صارفین سے براہ راست رابطے کا مقصد انہیں غیر ضروری مداخلت اور ایجنٹ مافیا سے محفوظ رکھنا ہے۔ترجمان کے مطابق درخواستوں کی جانچ پڑتال کے ذریعے مستحق اور قانونی صارفین کے حقوق کا تحفظ یقینی بنانے کے ساتھ غیر قانونی کنکشنز کی حوصلہ شکنی بھی کی جا رہی ہے۔وزیر توانائی اویس لغاری نے کہا ہے کہ حکومت شمسی توانائی سمیت قابلِ تجدید توانائی کے فروغ کو اہمیت دیتی ہے۔

ان کے مطابق مقصد سولرائزیشن کے عمل میں رکاوٹ ڈالنا نہیں بلکہ ایک ایسا شفاف، مؤثر اور طویل مدتی نظام تشکیل دینا ہے جو صارفین کے لیے بھی قابلِ اعتماد ہو۔حکام کے مطابق درخواستوں کی آن لائن نگرانی اور صارفین کے ساتھ براہ راست رابطے سے نیٹ میٹرنگ کے نظام میں شفافیت مزید بہتر ہوگی اور شہریوں کو اپنی درخواستوں کے بارے میں بروقت معلومات حاصل کرنے میں آسانی ہوگی۔