اسلام آباد( این این آئی)بجلی کے نئے کنکشنز کی فراہمی کا عمل آسان بنانے کیلے واضح ٹائم فریم مقرر کرنے کا فیصلہ کر لیا گیا۔
سابق وزیر اعلی پنجاب حمزہ شہباز کی زیرِ صدارت وزیر اعظم کے چیمبر میں اجلاس ہوا جس میں وفاقی وزیر توانائی سردار اویس لغاری اور محکمہ بجلی کے اعلی حکام نے شرکت کی۔اجلاس میں حمزہ شہباز نے انتظامیہ کو شہریوں کی سہولت کے لئے تمام اقدامات کی ہدایت اور نئے بجلی کنکشنز کی فراہمی کا عمل آسان بنانے کے لئے واضح ٹائم فریم مقرر کرنے کا فیصلہ کیا۔
انہوں نے ٹرانسفارمر اور بجلی کی دیگر تنصیبات سے متعلق عوامی شکایات کا فوری ازالہ یقینی بنانے پر زور دیا اور تجویز دی کہ عوام کی داد رسی کے لئے قومی اسمبلی کے تمام حلقوں میں واپڈا کے فوکل پرسنز مقرر کیے جائیں۔
