اسلام آباد (نیوز ڈیسک) امریکا میں مستقل رہائش کے خواہشمند غیر ملکیوں کے لیے امیگریشن کے عمل میں اہم تبدیلی کی جا رہی ہے،
جس کے نتیجے میں گرین کارڈ حاصل کرنا پہلے کے مقابلے میں مزید مشکل ہوسکتا ہے۔غیر ملکی میڈیا رپورٹس کے مطابق امریکی حکام نے ’پبلک چارج‘ سے متعلق امیگریشن پالیسی میں نئی ہدایات جاری کی ہیں، جن کا اطلاق ستمبر سے متوقع ہے۔نئے ضوابط کے تحت امریکی شہریت اور امیگریشن سروسز (USCIS) کے افسران کو درخواست گزار کی اس بات کا زیادہ تفصیلی جائزہ لینے کا اختیار ہوگا کہ آیا وہ مستقبل میں سرکاری مالی معاونت پر انحصار کرنے کا امکان رکھتا ہے یا نہیں۔
رپورٹ کے مطابق اب صرف درخواست گزار کی آمدنی یا مالی حیثیت ہی نہیں دیکھی جائے گی بلکہ فیصلہ کرتے وقت عمر، صحت، خاندانی حالات، تعلیم، مہارت اور دیگر متعلقہ عوامل کو بھی مدنظر رکھا جائے گا۔امریکی امیگریشن حکام کی جانب سے یہ تبدیلی 2022 میں محکمہ ہوم لینڈ سیکیورٹی کی طرف سے ’پبلک چارج‘ سے متعلق سابقہ سخت پالیسی واپس لیے جانے کے بعد سامنے آئی ہے۔نئی ہدایات کے باعث گرین کارڈ کے امیدواروں کی مالی اور ذاتی صورتحال کی جانچ پڑتال پہلے سے زیادہ تفصیلی ہونے کا امکان ہے، جس سے مستقل رہائش کے حصول کا عمل مزید سخت ہوسکتا ہے۔
