اسلام آباد (نیوز ڈیسک) نیشنل الیکٹرک پاور ریگولیٹری اتھارٹی (نیپرا) نے جون 2026 کی ماہانہ فیول پرائس ایڈجسٹمنٹ کے تحت ملک بھر کے بجلی صارفین کے لیے فی یونٹ بجلی کی قیمت میں 75 پیسے اضافے کی منظوری دے دی ہے۔

نیپرا کی جانب سے جاری نوٹیفکیشن کے مطابق یہ اضافہ تمام متعلقہ صارفین پر لاگو ہوگا، جن میں کے الیکٹرک کے صارفین بھی شامل ہیں۔ منظور شدہ اضافی رقم اگست کے بجلی کے بلوں کے ذریعے وصول کی جائے گی۔اس سے قبل سنٹرل پاور پرچیزنگ ایجنسی (سی پی پی اے) نے جون کی فیول ایڈجسٹمنٹ کے لیے فی یونٹ ایک روپے 20 پیسے اضافے کی درخواست دی تھی، تاہم ریگولیٹری اتھارٹی نے درخواست کا جائزہ لینے کے بعد صرف 75 پیسے فی یونٹ اضافے کی اجازت دی۔

یاد رہے کہ گزشتہ ماہ بھی مئی 2026 کی فیول پرائس ایڈجسٹمنٹ کے تحت بجلی کی قیمت میں 34 پیسے فی یونٹ اضافہ کیا گیا تھا، جس کے بعد مسلسل دوسرے ماہ صارفین کو اضافی مالی بوجھ برداشت کرنا پڑے گا۔