لاہور (نیوز ڈیسک) پنجاب میں ٹریفک قوانین پر عملدرآمد مزید سخت کرنے کا فیصلہ کرتے ہوئے سائیڈ ویو مررز اور انڈیکیٹرز کے بغیر موٹرسائیکل چلانے والوں کے خلاف کارروائی کا اعلان کر دیا گیا ہے۔
سٹی ٹریفک پولیس لاہور کے مطابق اب ایسے موٹر سائیکل سوار جو حفاظتی تقاضے پورے کیے بغیر سڑکوں پر سفر کریں گے، ان پر جرمانے عائد کیے جائیں گے۔ اس اقدام کا مقصد ٹریفک قوانین پر مؤثر عملدرآمد اور حادثات کی روک تھام کو یقینی بنانا ہے۔
ٹریفک پولیس کا کہنا ہے کہ صرف قانونی کارروائی ہی نہیں بلکہ شہریوں میں شعور اجاگر کرنے کے لیے آگاہی مہم بھی چلائی جائے گی۔ اس سلسلے میں مختلف مقامات پر ڈرائیور ایجوکیشن سیشنز منعقد کیے جائیں گے تاکہ موٹر سائیکل سواروں کو حفاظتی اصولوں اور ٹریفک قوانین سے آگاہ کیا جا سکے۔
حکام کے مطابق سائیڈ ویو مررز اور انڈیکیٹرز کی عدم موجودگی ٹریفک حادثات کی اہم وجوہات میں شمار ہوتی ہے، کیونکہ اس سے لین تبدیل کرتے یا موڑ کاٹتے وقت دوسرے ڈرائیورز کو بروقت اشارہ نہیں ملتا۔
سٹی ٹریفک پولیس نے موٹر سائیکل سواروں سے اپیل کی ہے کہ وہ اپنی گاڑیوں کو مکمل حفاظتی معیار کے مطابق رکھیں، سائیڈ ویو مررز اور انڈیکیٹرز درست حالت میں استعمال کریں اور اپنی جان کے ساتھ ساتھ دیگر شہریوں کی حفاظت کو بھی یقینی بنائیں۔
