اسلام آباد (نیوز ڈیسک)ملک بھر میں سونے کی قیمت میں نمایاں اضافہ ریکارڈ کیا گیا ہے،

جس کے بعد مقامی مارکیٹ میں فی تولہ سونا نئی بلند ترین سطح پر پہنچ گیا۔ آل پاکستان جیمز اینڈ جیولرز ایسوسی ایشن کی جانب سے جاری کردہ اعداد و شمار کے مطابق فی تولہ سونے کی قیمت میں 10 ہزار روپے کا بڑا اضافہ ہوا ہے، جس کے بعد نئی قیمت 4 لاکھ 37 ہزار 936 روپے مقرر کر دی گئی ہے۔

اسی طرح 10 گرام سونے کی قیمت میں بھی 8 ہزار 573 روپے کا اضافہ ریکارڈ کیا گیا، جس کے بعد اس کی نئی قیمت 3 لاکھ 75 ہزار 459 روپے ہو گئی ہے۔

ماہرین کے مطابق عالمی مارکیٹ میں سونے کی قیمتوں میں اتار چڑھاؤ اور بین الاقوامی معاشی صورتحال کے اثرات مقامی مارکیٹ پر بھی مرتب ہو رہے ہیں، جس کے باعث پاکستان میں سونے کے نرخوں میں نمایاں تبدیلی دیکھی جا رہی ہے۔

تاجروں کا کہنا ہے کہ عالمی سطح پر قیمتی دھاتوں کی قیمتوں میں مسلسل تبدیلی کے باعث مقامی مارکیٹ میں بھی سونے کے نرخ روزانہ کی بنیاد پر اوپر نیچے ہو رہے ہیں، جس کا براہِ راست اثر خریداروں اور سرمایہ کاروں پر پڑ رہا ہے۔