اسلام آباد (نیوز ڈیسک) بیرونِ ملک ملازمت کے لیے روانہ ہونے والے پاکستانی شہریوں کے لیے پروٹیکٹر رجسٹریشن سے متعلق اہم تفصیلات جاری کر دی گئی ہیں۔ بیورو آف امیگریشن اینڈ اوورسیز ایمپلائمنٹ نے ڈائریکٹ ایمپلائمنٹ ویزا رکھنے والے افراد کو رجسٹریشن فیس اور اس سے وابستہ سہولیات سے آگاہ کیا ہے۔

ادارے کی جانب سے جاری معلومات کے مطابق پروٹیکٹر رجسٹریشن کی مجموعی فیس 9,200 روپے مقرر کی گئی ہے، جس میں مختلف مدات کی ادائیگی شامل ہے۔

فیس کی تفصیلات یہ ہیں:

انشورنس فیس: 2,500 روپے
اوورسیز پاکستانیز فاؤنڈیشن (او پی ایف) ویلفیئر فنڈ: 4,000 روپے
رجسٹریشن فیس: 2,500 روپے
امیگریشن پروموشن فیس: 200 روپے

بیورو آف امیگریشن کا کہنا ہے کہ پروٹیکٹر رجسٹریشن مکمل کرنے والے افراد کو بیرونِ ملک ملازمت کے دوران متعدد قانونی اور مالی سہولتیں فراہم کی جاتی ہیں۔ ان میں پانچ سال کے لیے قابلِ تجدید 10 لاکھ روپے تک کی انشورنس، مالی معاونت اور مختلف قانونی تحفظات بھی شامل ہیں۔

حکام کے مطابق یہ رجسٹریشن بیرونِ ملک کام کرنے والے پاکستانیوں کے حقوق کے تحفظ اور ہنگامی حالات میں مدد فراہم کرنے کے لیے نہایت اہم ہے، اس لیے تمام افراد کو روانگی سے قبل یہ عمل مکمل کرنے کی ہدایت کی گئی ہے تاکہ مستقبل میں کسی قانونی یا انتظامی دشواری کا سامنا نہ کرنا پڑے۔

ماہرین نے بھی مشورہ دیا ہے کہ بیرونِ ملک روزگار کے خواہشمند افراد صرف مستند سرکاری ذرائع سے معلومات حاصل کریں اور تمام فیسیں مقررہ سرکاری طریقہ کار کے تحت ہی جمع کرائیں، تاکہ کسی بھی قسم کے فراڈ یا غیر قانونی مطالبات سے محفوظ رہا جا سکے۔