اسلام آباد (نیوز ڈیسک) : امریکا اور ایران کے درمیان جاری کشیدگی کے باوجود عالمی تیل مارکیٹ میں خام تیل کی قیمتوں میں کمی ریکارڈ کی گئی ہے،
جس کی بڑی وجہ مشرقِ وسطیٰ میں تیل کی ترسیل کا معمول کے مطابق جاری رہنا قرار دیا جا رہا ہے۔خبر رساں ادارے رائٹرز کے مطابق برینٹ خام تیل کی قیمت میں 1.29 ڈالر فی بیرل کمی ہوئی، جس کے بعد اس کی قیمت 89.45 ڈالر فی بیرل پر آ گئی۔اسی طرح امریکی ویسٹ ٹیکساس انٹرمیڈیٹ (WTI) خام تیل بھی سستا ہوا۔ اس کی قیمت 56 سینٹ یا تقریباً 0.66 فیصد کمی کے بعد 83.90 ڈالر فی بیرل ریکارڈ کی گئی۔رپورٹ کے مطابق اگرچہ امریکا اور ایران کے درمیان تناؤ برقرار ہے، تاہم خلیجی خطے میں تیل بردار جہازوں کی نقل و حرکت متاثر نہ ہونے سے سرمایہ کاروں کے خدشات میں کمی آئی، جس کے نتیجے میں قیمتوں پر بھی دباؤ کم ہوا۔
یاد رہے کہ اس سے قبل گزشتہ کاروباری روز جنگی خدشات کے باعث عالمی منڈی میں خام تیل کی قیمتوں میں نمایاں اضافہ دیکھا گیا تھا۔ اس دوران برینٹ خام تیل تقریباً 7.91 فیصد جبکہ ویسٹ ٹیکساس انٹرمیڈیٹ 6.56 فیصد اضافے کے ساتھ بند ہوا تھا۔اس سے ایک روز پہلے جنگ میں عارضی وقفے کی خبروں کے بعد عالمی منڈی میں خام تیل کی قیمتوں میں تقریباً 5 فیصد کمی بھی ریکارڈ کی گئی تھی، جس کے بعد قیمتوں میں ایک بار پھر اتار چڑھاؤ دیکھنے میں آیا۔
